„საქართველოში იმპორტირებული თამბაქოს პროდუქტის 80%-ზე მეტი უკრაინიდან შემოდის“, ამის შესახებ „კომერსანტს“ „ფილიპ მორის საქართველოში“ უთხრეს. მათივე ცნობით, ნორმალურ პირობებშიც კი, ანუ უკრაინაში, რომ ომი არ იყოს მცირე დროში რეგლამენტის ამოქმედება შეუძლებელია და იმ შემთხვევაში თუ ეს ნორმა ძალაში დარჩება და 1-ელი იანვრიდან ამოქმედდება თამბაქოს კონტრაბანდის სერიოზული რისკები შეიქმნება.
„საქართველოს მთავრობამ მიმდინარე წლის მაისში მიიღო ტექნიკური რეგლამენტი, რომელიც კონკრეტულად ადგენს წესებს, თუ როგორ უნდა გამოიყურებოდეს თითოეული კოლოფი, ფორმა, ზომა და ა.შ. ნორმალურ პირობებშიც კი, ანუ უკრაინაში ომი რომ არ იყოს, ამ მცირე დროში აღნიშნული რეგლამენტის ამოქმედება ფიზიკურად შეუძლებელია.
უკრაინაში შექმნილი სიტუაციიდან გამომდინარე კი, ეს პროცესი უფრო ხანგრძლივი და კომპლექსური გახდა, რადგან ნაცვლად ერთ ქარხანაში სტანდარტიზებული შეფუთვის შესაბამისი პროცესების დანერგვისა, თამბაქოს იმპორტიორ კომპანიებს გვიწევს რამდენიმე ქვეყნის სხვადასხვა ქარხნებში შესაბამისი პროცესების გადაწყობა, რომელიც 2023 წლის 1 იანვრამდე შეუძლებელი იქნება.
იმ შემთხვევაში, თუ ეს ნორმა ძალაში დარჩება და 1-ელი იანვრიდან ამოქმედდება, აღნიშნული სიტუაცია შექმნის თამბაქოს კონტრაბანდის სერიოზულ რისკებს, ლეგალური პროდუქტის არსებობას დიდი რისკის ქვეშ დააყენებს და ამავდროულად, მნიშვნელოვნად დაამძიმებს სავაჭრო ქსელების ოპერირებას“, - აცხადებენ „ფილიპ მორის საქართველოში“
საკანონმდებლო ორგანოში თამბაქოს ნაწარმის სტანდარტიზებული შეფუთვის ვალდებულების ამოქმედების გადავადებასთან დაკავშირებით კანონპროექტის განხილვა უახლოეს პერიოდში დაიწყება. უახლოეს დღეებში პროექტის განხილვას ჯანმრთელობის დაცვისა და სოციალურ საკითხთა კომიტეტი უახლოეს გეგმავს. ამასთან, განიხილება აღნიშნული ვალდებულების 2 წლით გადავადება, რაზეც სწორედ ჯანდაცვის კომიტეტში იმსჯელებენ.
რადიო „კომერსანტი“ ეთერში თამბაქოს კონტროლის ალიანსის ხელმძღვანელმა გიორგი ბახტურიძემ აღნიშნა, რომ ბიზნესი პარლამენტის კონკრეტულ წევრებთან გარკვეულ გარიგებაში გარკვეულ გარიგებაში შევიდა.
„ადრე ბიზნეს ასოციაციას შეჰქონდა პარლამენტში წინადადებები, ახლა მსგავსი განცხადებები პარლამენტის წევრებმა წარმოადგინეს, რაც იმას ნიშნავს რომ ბიზნესი გარკვეულ გარიგებაში შევიდა კონკრეტულ პარლამენტის წევრებთან . შესაბამისად ეს ადამიანებიც გაშიფრულები იქნებიან, რომ კონკრეტულ ბიზნეს და ფინანსურ ინტერესებს ლობირებენ “ - აღნიშნა გიორგი ბახტურიძემ.
შეგახსენებთ, რომ მოქმედი კანონმდებლობით 2023 წლის 1-ლი იანვრიდან საქართველოში ყველა სიგარეტის შეფუთვა სადა და ერთგვაროვანი უნდა გახდეს. აღნიშნულს გულისხმობს კანონი „თამბაქოს კონტროლის შესახებ“, რომლის თანახმადაც საქართველოში სარეალიზაციოდ განკუთვნილი თამბაქოს ნაწარმისა და მისი შეფუთვის სტანდარტიზების შესახებ ტექნიკური რეგლამენტი მთავრობამ 2022 წლის მაისში მიიღო.
თაკო კვაჭანტირაძე