უკრაინამ შარშან, წინასწარი მონაცემებით, სულ მცირე, 20 მლრდ დოლარის ღირებულების სასოფლო-სამეურნეო პროდუქციის ექსპორტი განახორციელა, რაც, 2021 წელთან შედარებით, დაახლოებით, ნახევრით ნაკლებია. ამის შესახებ ქვეყნის სურსათისა და აგრარული პოლიტიკის მინისტრმა, ნიკოლაი სოლსკიმ ეროვნულ ტელემარათონში განაცხადა, რასაც „ინტერფაქს-უკრაინა“ ავრცელებს.
მინისტრმა ხაზგასმით აღნიშნა, რომ განახევრების მიუხედავად, ეს ექსპორტის მნიშვნელოვანი მაჩვენებელია, განსაკუთრებით რუსეთის ფედერაციის აგრესიისა და სხვა გარემოებების გათვალისწინებით, რა პირობებშიც უკრაინა გარე მიწოდებებს ახორციელებდა. ნიკოლაი სოლსკის მონაცემებით, 2021 წელს აგროპროდუქციის ექსპორტიდან სავალუტო შემოსავლების უმეტესი ნაწილი სოფლის მეურნეობის სექტორს ერგო, მაშინ, როცა 2022 წელს ამ ექსპორტიდან მარჟის მნიშვნელოვანი ნაწილი ინფრასტრუქტურულ და ლოგისტიკურ კომპანიებს დარჩათ. მინისტრის შეფასებით, საომარი რისკების გამო საგრძნობლად გაძვირდა მარცვლეულის გადამზიდავი გემები და სადაზღვევო მომსახურება და მსგავსი ვითარება შესაძლოა, მომავალ წელსაც შენარჩუნდეს.
უკრაინის ეკონომიკის სამინისტროს წინასწარი მონაცემებით, გასულ წელს ქვეყნიდან მთლიანობაში 44,1 მლრდ დოლარის ღირებულების 99,8 მილიონი ტონა პროდუქცია და ყველა სახის საქონელი გავიდა ექსპორტზე, რაც 2021 წელზე 38,4%-35%-ით ნაკლებია. შემოსავლის უმეტესი ნაწილი სოფლის მეურნეობის პროდუქტების ექსპორტიდან იქნა მიღებული. კერძოდ, სიმინდის ექსპორტიდან - 5,94 მლრდ დოლარი, რაც, 2021 წელთან შედარებით, 1%-ით მეტია, მზესუმზირის ზეთიდან - 5,46 მლრდ დოლარი, რაც წინა წელთან შედარებით 14,4%-ით ნაკლებია, ხორბლიდან - 2,6 მლრდ დოლარი (მინუს 44,7 %), რაფსიდან - 1,54 მლრდ დოლარი (მინუს 8,6%), მზესუმზირიდან - 1,26 მლრდ დოლარი, რაც 33-ჯერ მეტია, სოიოდან - 862 მლნ დოლარი (+43%), ფრინველის ხორციდან - 852 მლნ დოლარი (+19%).
უკრაინა
