„აგრო ქართუმ“ ეროვნულ სატყეო სააგენტოს ტყითსარგებლობის უფლების მოპოვებისთვის, კერძოდ - ცხოველთა თავშესაფრისა და სანაშენის მოწყობის უფლებისთვის, 2021 წლის 25 ნოემბერს მიმართა, ნათქვამია გარემოს დაცვისა და სოფლის მეურნეობის სამინისტროს განცხადებაში.
ტყითსარგებლობის უფლების გაცემისთვის, ეროვნულ სატყეო სააგენტოში ადმინისტრაციული წარმოება დაიწყო. კომპანიის მიერ მთელი რიგი დოკუმენტაცია იქნა წარმოდგენილი. სააგენტოს გადაწყვეტილებით, 125 248 კვ. მეტრი მიწის ნაკვეთზე, 2022 წლის 23 სექტემბერს საჯარო აუქციონი (N725 - აუქციონის ლოტი - N-725FJX122) ჩატარდა, რომელიც შპს „აგრო ქართუს“ გამარჯვებით დასრულდა. შპს „აგრო ქართუმ“ აღნიშნული უფლებით სარგებლობისთვის, ტყის მართვის ორგანოს, ყოველწლიურად 32 877.6 ლარი უნდა გადაუხადოს და ასევე, უნდა წარმოადგინოს საგარანტიო თანხა 6262.4 ლარის ოდენობით. ეროვნულ სატყეო სააგენტოსა და „აგრო ქართუს“ შორის ხელშეკრულება 2022 წლის ოქტომბერში გაფორმდა.
სამინისტროს წერილში ვკითხულობთ, რომ კანონმდებლობის თანახმად, საქართველოს ტყეში შეიძლება განხორციელდეს ტყით სპეციალური სარგებლობის (იჯარა) შემდეგი სახეები: პლანტაციური მეურნეობის მოწყობა; სასოფლო-სამეურნეო მიზნით ტყითსარგებლობა (სათიბად, საძოვრად, ან ფუტკრის დროებითი სადგომების მოსაწყობად); საკურორტო, რეკრეაციული, სპორტული და სხვა კულტურულ-გამაჯანსაღებელი მიზნებით ტყითსარგებლობა; თევზის მეურნეობის ან სამონადირეო მეურნეობის მოწყობა; ცხოველთა თავშესაფრისა და სანაშენის მოწყობა.
ტყითსარგებლობისთვის იჯარები არ გაიცემა მხოლოდ ორმოცდაცხრაწლიანი ვადით. გაცემულია სარგებლობის ხუთწლიანი იჯარები. მაგალითად - ფუტკრის სადგომებისთვის და ათწლიანი სათიბ-საძოვრებისთვის. რაც შეეხება ორმოცდაცხრაწლიან ტყითსარგებლობას მნიშვნელოვანია, რომ მას საკურორტო, რეკრეაციული, სპორტული და სხვა კულტურულ-გამაჯანსაღებელი დატვირთვა აქვს, რაც მორგებულია მოსახლეობაზე და არ მხოლოდ ერთი სუბიექტის ინტერესებზე.
ეროვნულ სატყეო სააგენტოში 2022 წელს (1 ნოემბრამდე), ტყით სპეციალური სარგებლობის უფლების გასაცემად, 20 აუქციონი გამოცხადდა, საიდანაც შემოსულმა თანხამ 166 993.10 ლარი შეადგინა, ნათქვამია წერილში.