„აგრობიზნესს ყოველთვის ისე ვუყურებდი, როგორც ჩვენი ქვეყნის მომავალს, რადგან ამაში უდიდესი პოტენციალია“, - ამის შესახებ, რადიო „კომერსანტის“ გადაცემაში „აგროსექტორი“ საქართველოს დისტრიბუტორთა ასოციაციის თავმჯდომარემ ისაუბრა. ივა ჭყონია, რომელიც შპს ,,გრანდის“ დამფუძნებელია, ამბობს, რომ საქართველოში ერთ-ერთი მთავარი პრობლემა ის არის, რომ გრძელვადიან პერსპექტივის გეგმას არ მივყვებით, მაგალითად ატმის სეზონი როცაა, ვცდილობთ სრული მოსავალი მოკრეფისთანავე  გავყიდოთ, თუმცა სხვაგვარად უნდა ხდებოდეს.

„აგრობიზნესში წასვლა იმიტომ გადავწყვიტე, რომ მინდოდა იმპორტირებულის ნაცვლად ქართული შემეთავაზებინა ბაზრისთვის. თემურ ჭყონიამ მკითხა თუ რა შეიძლებოდა მიმეწოდებინა „მაკდონალდსისთვის“ ქართული. შევთავაზე  სალათის ფურცელი, რაზეც მოთხოვნა საკმაოდ მაღალია. ლაგოდეხში მოვიყვანე სალათის ფურცელი და ასე დავიწყეთ. მოგეხსენებათ, „მაკდონალდსი“ მსოფლიო ქსელია, როდესაც რამე პროდუქტზე იზრდება მოთხოვნა, ქსელში მოდის ეს ინფორმაცია. აღმოჩნდა რომ რუსეთის „მაკდონალდსშიც“ მაღალი იყო მოთხოვნა ამ კულტურაზე. ჩვენ გვქონდა რესურსი რომ რუსეთისთვისაც გვეწარმოებინა და ეს ჩვენი ქვეყნისთვისაც სარფიანი ყოფილიყო. მაგრამ ახლა სხვა რეალობაში აღმოვჩნდით, ომმა ზიანი მოგვაყენა და რეალურად აბსოლუტურად შევცვალეთ ხედვები და  ვორიენტირდით მხოლოდ საქართველოს  ბაზარზე.

ამ ეტაპზე თავს  შევიკავებ იმის დასახელებისგან თუ რა კულტურებზე ვმუშაობთ სალათის ფურცლების გარდა. თუმცა „მაკდონალდსი“ საქართველოშიც არის და მათაც მოვამარაგებთ ხარისხიანი სალათის ფურცლებით. ჩვენ რამდენიმე  სხვადასხვა ჯიშის სალათის ფურცელს მოვიყვანთ, ექსპერიმენტული ჯიშის ბოსტნეულზე ორიენტაცია ავიღეთ. მომავალში ვფიქრობთ, რომ ვითანამშრომლოთ „აგროჰაბთან“, „გუდვილთან“, ასევე ამ მიმართულებაზე მაღალი მოთხოვნა აქვს  სასტუმროების ქსელ „რუმსს“ და  ა.შ. საცდელად დავთესეთ საზამთროს ჯიში, რომლის გარეკანი არის  შავი, შიგთავსი ხასხასა წითელი და უკურკო. გვექნება  „გუდვილთან“  ხელშეკრულება, ამ პროდუქტს მივაწვდით და ვნახოთ ბაზარი როგორ მიიღებს.  ძვირი ეღირება, მაგალითად თუ ერთი კილო საზამთრო ღირს 1 ლარი, ეს  ეღირება  3 ლარი, მაგრამ გვინდა რომ ქართულ ბაზარს სიახლე შევთავაზოთ“, -  აღნიშნა ივა  ჭყონიამ.

ჭყონიას თქმით სოფლის მეურნეობის სამინისტროს მხრიდანაც აქვთ მხარდაჭერა, ტრაქტორების და მისი მისაბმელების შეძენაც სოფლის მეურნეობის პროგრამით მოხდა. ასევე მუშაობს სასაწყობე და სამაცივრე მეურნეობაზე სადაც ზამთრისთვის პროდუქტის შენახვასაც მოახერხებს.

„ჩვენ გვექნება პროდუქტი მაშინაც, როდესაც ეს დეფიციტურია“, - აღნიშნა ივა  ჭყონიამ. მისივე თქმით გამომდინარე იქიდან, რომ ლაგოდეხი  სუბტროპიკული ზონაა, აპირებს ეკო კოტეჯების განთავსებასაც. ასევე 5-6 კლასელების  ჩაყვანას, აგროტურიზმის განვითარებას და პატარების აგრობიზნესით დაინტერესებას.

„სადემონსტრაციო ნაკვეთებიც  გვექნება და მოვსინჯავთ რამდენად შესაძლებელია ამა თუ იმ მიწის ნაკვეთზე პროდუქტის და ბოსტნეულის მოყვანა,  ეს  არის  ჩვენი ქვეყნის მომავალი და  ვეცდები რომ ამ საქმეში ვიყო  სტარტაპერიც და ლიდერიც  და სხვებსაც მოვუწოდო გაკეთებისკენ“, -  აღნიშნა ივა  ჭყონიამ.

თაკო კვაჭანტირაძე