4 ივნისს, ჭიათურის მუნიციპალიტეტის სოფელ კაცხში, იმერეთი აგროს მხარდაჭერით აგროტურისტული ფესტივალი “ჭიათურა 2022” გაიმართება. იმერეთი აგროს მხარდამჭერი კი ჯორჯიან მანგანეზია.
ღონისძიება ჭიათურის ტურისტული საინფორმაციო ცენტრის ორგანიზებით და ჭიათურის მუნიციპალიტეტის მერიის მხარდაჭერით წარიმართება.
აგროტურისტული ფესტივალი მიზანი ადგილობრივი აგრო პროდუქტების წარმოჩენა, დარგში მიმდინარე პროექტებისა და ახალი ტურისტული პროდუქტების პრეზენტაცია-პოპულარიზაციაა, ასევე ადგილობრივი ტურისტული ინფრასტრუქტურის განვითარების ხელშეწყობა და ჭიათურის ტურისტული პოტენციალის წარმოჩენა.

ფესტივალის კარი ყველა სტუმრისთვის ღიაა. ამასთან, სტუმრებს შესაძლებლობა ექნებათ ჭიათურის მუნიციპალიტეტში რეგისტრირებული მეწარმე ბენეფიციარების მიერ დამზადებული აგრო პროდუქციის ყიდვა და დაგემოვნება.

ფესტივალზე, 30-მდე მეწარმე წარმოადგენს ადგილობრივ პროდუქციას, მათ შორის ღვინოს, ყველს, ჩაის, თაფლს და სხვადასხვა ნატურალურ პროდუქტს. მეწარმე ზურა მაჩიტიძე კი მოძრავი თონის საშუალებით პურს გამოაცხობს. ასევე, გამოფენის ერთ ნაწილში გამოფენილი იქნება ტურისტული ლოკაციების ფოტო მასალა.

იმერეთი აგროს სტენდზე წარმოდგენილი იქნება სანერგე მეურნეობის პროდუქცია.
იმერეთი აგროს მმართველი მენეჯერის ცისანა ხარაზიშვილის განცხადებით, ფესტივალის მხარდაჭერით მათ სურთ ჭიათურის რაიონის აგრო და ტურისტული პოტენციალის წარმოჩენა და პოპულარიზაცია. „ჭიათურა მართლაც გამორჩეული მხარეა იმერეთში და იმერეთი აგროს მიზანია, ერთ მხრივ, ხელი შევუწყოთ ადგილობრივ მეწარმეებს განავითარონ თავიანთი მეურნეობები და მეორე მხრივ, საზოგადოებას მივაწოდოთ ინფორმაცია ჭიათურის აგროტურისტული პოტენციალის შესახებ, რაც დამატებითი შესაძლებლობაა რეგიონის პოპულარიზაციისათვის.“
პროგრამა:

11:00 საათი - ჭიათურის მუნიციპალიტეტში რეგისტრირებული მეწარმე ბენეფიციარების აგროტურისტული პროდუქციის გამოფენა-გაყიდვა, დეგუსტაცია, ტურისტული ლოკაციების ფოტო-გამოფენა.
11:30 საათი - გახსნა.

12:00 საათი - ადგილობრივი შემოქმედებითი ჯგუფების კონცერტი.

14:00 - 18:00 საათი - ჭიათურის მუნიციპალიტეტში რეგისტრირებული მეწარმე ბენეფიციარების აგროტურისტული პროდუქციის გამოფენა-გაყიდვა.

იმერეთი აგროს მხარდამჭერია ჯორჯიან მანგანეზი.

(R)