საქართველოს იუსტიციის სამინისტროს აღსრულების ეროვნული ბიურო „სამთო კომპანია ფარავანპერლიტის“ 70%-იან წილს ყიდის. აუქციონი 10 აპრილსაა ჩანიშნული და კომპანიის 70%-იანი წილს საწყისი ღირებულება 630 750 ლარია.

აუქციონის ვებ გვერდზე გამოქვეყნებული ინფორმაციის მიხედვით, პერლიტის მოპოვებასთან დაკავშირებით „სამთო კომპანია ფარავანპერლიტი“ ლიცენზიას არ ფლობს და ის პერლიტს შპს ,,ჯც“-სთან გაფორმებული ლიცენზიის იჯარის ხელშეკრულებით მოიპოვებს, რომლის მოქმედების ვადა 2026 წლის 17 ოქტომბერს იწურება.

კომპანიას აქტივები სულ 2,313,333.00 ლარს შეადგენს ( მიმდინარე აქტივები - 510,099.00 ლარის, კერძოდ: ნაღდი ფული სალაროში -262.00 ლარი, ფული საბანკო ანგარიშზე - 111.00 ლარი, დებიტორული დავალიანება 15782.00 ლარი, სასაქონლო მარაგები/ნედლეული - 475,488 ლარი, წინასწარ გაწეული ხარჯები (წინასწარ გადახდილი იჯარა, რეკლამა, დაზღვევა და სხვა) – 18456.00 ლარი. გრძელვადიანი აქტივები - 1,806,234.00 ლარის, კერძოდ: ავეჯი და ოფისის მოწყობილობა - 11,365.00 ლარი, მოწყობილობა და დანადგარები - 435,872.00 ლარი, სატრანსპორტო საშუალებები - 237,168.00 ლარი, უძრავი ქონება - 131,559.00 ლარი, მიწა - 990,000.00 ლარი).

კომპანიის ვალდებულებები კი სულ 1,115,049.00 ლარია (მიმდინარე ვალდებულებები - კრედიტორული დავალიანება (მომწოდებლებისათვის გადასახდელი თანხები) – 228,800.00 ლარი, საგადასახადო ხარჯები (ხელფასები, იჯარა, დაზღვევა, კომუნალური და სხვა) – 187,126.00 ლარი, ავანსად მიღებული შემოსავლები - 659,123.00 ლარი, მოკლევადიანი სესხები - 40,000.00 ლარი. გრძელვადიანი ვალდებულებები ბალანსზე არ ერიცხება).

საჯარო რეესტრის მონაცემების მიხედვით, „სამთო კომპანია ფარავანპერლიტი“-ში 70%-იან წილს ფლობს ქეთევან ვახტანგიშვილი, 10%-ს თამარ დვალიშვილი, 10%-ს ქეთევან კვარაცხელია, ხოლო დარჩენილ 10%-ს ალექსანდრე კვარაცხელია.

შპს „სამთო კომპანია ფარავანპერლიტი” 2002 წელს დაფუძნდა. წიაღით სარგებლობის ლიცენზიის საფუძველზე, კომპანია ახორციელებს პერლიტის მოპოვებას, ნედლეულის გადამუშავებას და ფრაქციონირებული პერლიტის პროდუქციის რეალიზაციას. პერლიტის საბადო მდებრეობს საქართველოს მაღალმთიან რეგიონში, თბილისიდან 130 კმ–ში, ზღვის დონიდან 2150–2300 მეტრ სიმაღლეზე, საქართველოს უდიდესი ტბის „ფარავნის“ სიახლოვეს.

სამთო კომპანია „ფარავანპერლიტი“ საქართველოში ერთადერთი მწარმოებელია პერლიტის ბლოკებისა და პერლიტის სხვადასხვა სამშენებლო პროდუქტის, რომელიც შეესაბამება „ეკო სახლისა“ და „თბილი სახლის“ თანამედროვე სტანდარტებს, სამშენებლო მასალებისა და ენერგო რესურსების ეფექტურად გამოყენების თვალსაზრისით.