ამერიკის გეოფიზიკური კავშირის (AGU) მკვლევარებმა მყინვარ Thwaites-ის (ტუეიტსის) აღმოსავლეთ ნაწილზე დიდი ბზარები აღმოაჩინეს, რამაც შესაძლოა, უახლოეს რამდენიმე წელში ყინულის შელფის სრული დაშლა გამოიწვიოს. გამაფრთხილებელი განცხადება AGU-ს მკვლევარებმა ვირტუალურ ბრიფინგზე გააკეთეს.
100-მდე მეცნიერთა ჯგუფი უკვე მესამე წელია, ანტარქტიდის ამ საკვანძო მყინვარის შელფს აკვირდება. დასავლეთ ანტარქტიდის მყინვარი Thwaites დედამიწაზე ყველაზე ფართოა, რომელიც, დაახლოებით, 120 კმ-ზე არის გადაჭიმული. ყინულის სისქე 800-დან 1200 მ-მდეა. Thwaites-ს ზოგჯერ „განკითხვის დღის მყინვარად მოიხსენიებენ, რადგან მისმა ნგრევამ შესაძლოა, ანტარქტიდაზე მყინვარების ნგრევის კასკადი გამოიწვიოს. გაყინული კონტინენტის ბოლოდროინდელი კვლევების პროგნოზით, მყინვარის დასასრული მოსალოდნელზე ადრე დადგება.
ადამიანის ზემოქმედებით გამოწვეული კლიმატის ცვლილების, დედამიწის ატმოსფეროსა და ოკეანეებში გაძლიერებული დათბობის წყალობით, Thwaites-მა 2000 წლიდან 900 მილიარდი ტონა ყინული დაკარგა. ბოლო 30 წლის განმავლობაში ყინულის წლიური დანაკარგი გაორმაგდა და ამჟამად ის წელიწადში, დაახლოებით, 45 მილიარდ ტონა ყინულს კარგავს, ვიდრე დათოვლვის შედეგად იღებს.
AGU-ს ერთ-ერთი მკვლევარის, ტედ სკამბოსის თქმით, Thwaites-ის მყინვარი მთლიანად რომ დადნეს, ოკეანეში ჩაღვრილი წყლის შედეგად, ზღვის დონე მთელს მსოფლიოში 65 სმ-ზე მეტად მოიმატებს, ხოლო თუ ეს პროცესი მიმდებარე მყინვარებსაც ჩაითრევს, ამან შესაძლოა, ზღვის დონის 3 მ-მდე აწევა გამოიწვიოს.
AGU-მ სატელიტური გამოსახულებებიც წარმოადგინა, რომლებიც Thwaites-ის აღმოსავლეთ შელფზე გამავალ რამდენიმე დიდ დიაგონალურ ნაპრალს ასახავს. აღმოსავლეთ შელფზე გიგანტური ბზარი ორი წლის წინ გამოჩნდა, ხოლო ბოლოდროინდელი სატელიტური სურათების სერიამ აჩვენა, რომ განგრძობადი ნაპრალი პირდაპირ იმ ადგილს მიადგა, სადაც მკვლევარები სეზონზე თავიანთი საველე სამუშაო ადგილის მოწყობას გეგმავდნენ.
bpn.ge