აგვისტოს ეკონომიკურ ზრდაში ერთ-ერთი მთავარი კონტრიბუტორი ტრანსპორტისა და დასაწყობების სექტორი იყო, სადაც წინა წლის შესაბამის პერიოდთან შედარებით შეინიშნებოდა ზრდა, — ამის შესახებ საქართველოს სტატისტიკის ეროვნული სამსახურის აღმასრულებელმა დირექტორმა გოგიტა თოდრაძემ, გადაცემაში „ბიზნეს ინსაიდერი“ გიორგი აბაშიშვილთან ერთად განაცხადა. 

„8 თვის განმავლობაში ექსპორტი გაზრდილია 37%-ით, ხოლო იმპორტი დაახლოებით 35%, ამის პარალელურად გაიზარდა ტვირთის დამუშავების და დასაწყობების მაჩვენებელიც. გარდა ამისა მშენებლობის სექტორი იყო მნიშვნელოვანი კონტრიბუტორი, ასევე ინფრასტრუქტურული მშენებლობა. გაზრდილია სასტუმროების და რესტორნების სექტორის მიმართულებაც, რაც დაკავშირებულია ვიზიტორების ზრდასთან. გარდა ამისა საფინანსო სექტორი და კომერციული ბანკების მიერ მიღებული შემოსავლები იყო მთავარი კონტრიბუტორი აგვისტოს ეკონომიკურ ზრდაში და ასევე ვაჭრობის სექტორი. 

თუმცა ორ სექტორში გამოვლინდა კლების ტენდენცია, ეს იყო დამამუშევებელი მრეწველობა და მინერალური წყლების კომპონენტი. სადაც შემცირებულია ექსპორტი წინა წლის შესაბამის პერიოდთან შედარებით“, — აღნიშნა გოგიტა თოდრაძემ.

საქსტატის აღმასრულებელმა დირექტორმა მსხვილ, მცირე და საშუალო ბიზნესების მიერ დღგ-ს შექმნაში მონაწილეობის მიღების სტატისტიკაზეც ისაუბრა და აღნიშნა, რომ დღგ-ს უდიდესი ნაწილი ძირითადად მატერიალური წარმოების სექტორებში იქმნება.

„მსხვილი ბიზნესის წილი საერთო ბრუნვაში საკმაოდ მაღალია და 50%-საც კი აღემატება, მსგავსი კატეგორიის 400-მდე კომპანიაა. დღგ-ს უდიდესი ნაწილი ძირითადად მატერიალური წარმოების სექტორებში იქმნება, მაგალითად დამამუშავებელ მრეწველობაში და მშენებლობაში ვიდრე ვაჭრობის და სხვა მსგავს დარგებში. სერვის სექტორი უფრო ნაკლები კონტრიბუტორია, რადგან ეკონომიკის ზომა ფასდება შექმნილი დამატებული ღირებულებით და არა ბრუნვის მეშვეობით“, — ამბობს გოგიტა თოდრაძე.

მისი თქმით, სექტემბრის გაზრდილ ინფლაციაზე სურსათის, უალკოჰოლო სასმელების და კერძო სკოლების სწავლის გადასახადის გაზრდილმა ფასმა იქონია მნიშვნელოვანი გავლენა.

„სექტემბრის ინფლაცია უფრო მაღალია ვიდრე აგვისტოში იყო და 11.5% შეადგინა. ზრდა ძირითადად განპირობებულია სხვადასხვა სახის სასურსათო პროდუქტების ფასების ზრდით. მაგალითად გაზრდილია სწავლის გადასახადი, აქ ძირითადად საუბარია კერძო სკოლების და სკოლამდელი დაწესებულებების გადასახადის ზრდაზე. ასევე აღნიშნული მაჩვენებელი შედარებით მაღალია სურსათისა და უალკოჰოლო სასმელების ჯგუფში და სწორედ ეს ჯგუფი იყო ერთ-ერთი მთავარი კონტრიბუტორი მაჩვენებლის ჩამოყალიბების შემთხვევაში. თუმცა საწვავი მინუსით იყო წარმოდგენილი“, —  აღნიშნავს გოგიტა თოდრაძე.