2022 წლის აგვისტოში, საბანკო სექტორის სადეპოზიტო ვალდებულებები წლიურად 6.35 მლრდ ლარით (თვიურად 2,985.1 მლნ ლარით) გაიზარდა და 41.8 მლრდ ლარი შეადგინა. ამის შესახებ ეროვნული ბანკის აგვისტოს თვის მიმოხილვაშია აღნიშნული.
„სადეპოზიტო ვალდებულებები წლიურად 17.9%-ით გაიზარდა, მეტწილად ეროვნული ვალუტის დეპოზიტების მატების გავლენით. კერძოდ, აგვისტოში წინა თვესთან შედარებით, ლარის სადეპოზიტო ვალდებულებები 790.6 მლნ ლარით (4.7%-ით) გაიზარდა და 17.5 მლრდ ლარი შეადგინა. აღნიშნული ზრდა, ძირითადად იურიდიული პირების დეპოზიტების მატებამ განაპირობა, რომლის მოცულობაც წინა თვესთან შედარებით 359.5 მლნ ლარით გაიზარდა. ამავდროულად, საბანკო სისტემის დეპოზიტებს სამთავრობო სექტორის დეპოზიტებიც ზრდიდა. რაც შეეხება უცხოური ვალუტის დეპოზიტებს, წინა თვესთან შედარებით, 371.7 მლნ აშშ დოლარით გაიზარდა. მატება ძირითადად ფიზიკური პირების დეპოზიტებზე მოდის“, — ნათქვამია ანგარიშში.
ეროვნული ბანკის ინფორმაციით, მიმდინარე წლის აგვისტოში დეპოზიტების საშუალო შეწონილი საპროცენტო განაკვეთები (მთავრობის გარეშე) წინა თვესთან შედარებით 0.07 პპ გაიზარდა და 5.45% შეადგინა. ეროვნული ვალუტით დეპოზიტებზე საშუალო შეწონილი წლიური საპროცენტო განაკვეთი 0.2 პპ შემცირდა და 7.7% შეადგინა, ხოლო უცხოური ვალუტით გაცემულ დეპოზიტებზე - 0.04 პპ-ით, 0.7%-მდე შემცირდა. რეზიდენტების ვადიანი დეპოზიტების საპროცენტო განაკვეთები შემცირდა, რაც მეტწილად ლარისა და ევროს ვადიანი დეპოზიტების საპროცენტო განაკვეთის შემცირებამ განაპირობა. კერძოდ, ლარის დეპოზიტების საპროცენტო განაკვეთმა წინა თვესთან შედარებით 0.2 პპ-ით მოიკლო და 12.0% შეადგინა, ხოლო ევროს ვადიანი დეპოზიტის საპროცენტო განაკვეთი 0.15 პპ-ით, 0.5%-მდე შემცირდა. დოლარის დეპოზიტების საპროცენტო განაკვეთი წინა თვესთან შედარებით 0.05 პპ-ით გაიზარდა და 1.1% შეადგენს.
„უცხოური და ეროვნული ვალუტის დეპოზიტების ზრდის ტემპებიდან გამომდინარე, დეპოზიტების დოლარიზაცია, 2022 წლის აგვისტოში წინა თვესთან არ შეცვლილა და 58.2% შეადგენს. აგვისტოს ბოლოს, იურიდიული პირების დეპოზიტების დოლარიზაცია 0.1 პპ-ით შემცირდა 47.4% შეადგინა, თუმცა ფიზიკური პირების დეპოზიტების დოლარიზაცია 0.9 პპ-ით გაიზარდა და 73% შეადგინა. აღსანიშნავია, რომ აგვისტოს თვეში ფიზიკური პირების ვადიანი დეპოზიტების დოლარიზაციამაც მოიმატა და წინა თვესთან შედარებით 1.3 პპ-ით, 69.3%-მდე გაიზარდა“, — აღნიშნულია სებ-ის მიმოხილვაში.