მიზეზი, რის გამოც გიორგი კოდუას Air Georgia აშშ-ს მიმართულებით ფრენებს ვერ იწყებს საჰაერო ხომალდის არ ქონაა.

როგორც „კომერსანტს“ სამოქალაქო ავიაციის სააგენტოში განუცხადეს, სააგენტოს მიერ შპს „აირ ჯორჯიას“ საჰაერო ხომალდის ექსპლუატანტის სერტიფიკატი და საჰაერო გადაყვანა-გადაზიდვის მოწმობა 2022 წლის დეკემბერში  გაუქმდა, ვინაიდან შპს „აირ ჯორჯიას“ ექსპლუატაციაში მყოფი ერთადერთი თვითმფრინავი - Airbus 330-343, სამოქალაქო საჰაერო ხომალდების სახელმწიფო რეესტრიდან მესაკუთრის მოთხოვნით იქნა ამოღებული.

„კანონმდებლობის მოთხოვნების შესაბამისად, ავიაკომპანიის ექსპლუატაციაში საჰაერო ხომალდის არყოლა წარმოადგენს საჰაერო ხომალდის ექსპლუატანტის სერტიფიკატის და გადაყვანა-გადაზიდვის მოწმობის გაუქმების ერთ-ერთ პირდაპირ საფუძველს. აღსანიშნავია, რომ შპს „აირ ჯორჯიას“ კომერციული საჰაერო გადაყვანა-გადაზიდვის განხორციელების 2022 წლის ივლისში მინიჭებული უფლებამოსილებისა და სააგენტოში წარმოდგენილი 6-თვიანი ბიზნესგეგმის მიუხედავად, არ შეუსრულებია არც ერთი რეისი, “— განუცხადეს „კომერსანტს“ სამოქალაქო ავიაციის სააგენტოში.

სააგენტოს განცხადებით, სახელმწიფოს ერთ-ერთ მნიშვნელოვან პრიორიტეტს წარმოადგენს ამერიკის შეერთებულ შტატებთან პირდაპირი საჰაერო მიმოსვლის დაწყება, რაც საკმაოდ ხანგრძლივ და კომპლექსურად მოსამზადებელ პროცესებთან არის დაკავშირებული:

„აქვე მოგახსენებთ, რომ ავიაციის სფეროში სახელმწიფოს ერთ-ერთ მნიშვნელოვან პრიორიტეტს წარმოადგენს ამერიკის შეერთებულ შტატებთან პირდაპირი საჰაერო მიმოსვლის დაწყება, რაც საკმაოდ ხანგრძლივ და კომპლექსურად მოსამზადებელ პროცესებთან არის დაკავშირებული.  შესაბამისი სახელმწიფო უწყებების ჩართულობით, სხვადასხვა დონეზე გაიმართა არაერთი შეხვედრა აშშ-ს სახელმწიფო თუ კერძო სექტორის წარმომადგენლებთან. საქართველოსა და აშშ-ს საავიაციო ხელისუფლებების წარმომადგენლებს შორის, ბოლო ასეთი შეხვედრა გასული წლის ბოლოს შედგა, სადაც, მათ შორის, დეტალურად იქნა განხილული ორ ქვეყანას შორის პირდაპირი საჰაერო მიმოსვლის დაწყების და ამ მიზნით, საავიაციო უწყებებს შორის თანამშრომლობის გაღრმავების პერსპექტივები.

ასევე გვსურს განვმარტოთ, რომ ავიაკომპანიის მიერ აშშ-ს მიმართულებით პირდაპირი რეგულარული ფრენების დაწყებას ესაჭიროება სხვადასხვა ნებართვების მიღება აშშ-ის შესაბამისი უწყებებისგან. აქედან გამომდინარე, სააგენტო მოუწოდებს ავიაციის სფეროში ჩართულ სუბიექტებს, არ შეიყვანონ საზოგადოება შეცდომაში და არ გაავრცელონ შეუსაბამო ინფორმაცია“, - აცხადებენ სააგენტოში.

აღსანიშნავია, რომ რამდენიმე დღის წინ ამერიკის მიმართულებით ფრენების დაწყების გეგმებზე BMG-თან „ეარ ჯორჯიას“ ხელმძღვანელმა გიორგი კოდუამ ისაუბრა. მისი თქმით, „ეარ ჯორჯია“ უკვე წელიწადზე მეტია თბილისი-ნიუ-იორკის მიმართულებით ფრენების დასაწყებად ნებართვას ელის. კოდუას განმარტებითვე, აღნიშნულზე კი დასტური სამოქალაქო ავიაციის სააგენტომ უნდა გასცეს, რომელმაც ამერიკული სტანდარტები უნდა დანერგოს.

''საქართველოს ხელისუფლებას მივმართეთ, რომ მზად ვართ ფრენები დავიწყოთ. დარჩენილია პროცედურა, რომ საქართველოს სამოქალაქო ავიაციის სააგენტომ ამერიკული სტანდარტები დანერგოს. ამას თავად აშშ ითხოვს. ჩვენ ახლა ევროპული რეგულაციებით ვოპერირებთ,“ — აცხადებს „ეარ ჯორჯიას“ დირექტორი, გიორგი კოდუა.

ამასთან, კოდუა აღნიშნავს, რომ კომპანია მოლაპარაკებებს აწარმოებს პორტუგალიურ კომპანიასთან, რათა რეისები ევროპული კომპანიის ქვეშ დაიწყოს. შესაბამისად, კომპანიაში ელიან, რომ თბილისი-ნიუ-იორკის პირველი რეისი ივნისში განხორციელდება.