2024 წლიდან ქართულ ავიაბაზარზე ახალი ეროვნული ავიაკომპანია - Air Iveria იწყებს ოპერირებას. კომპანიამ მარტში Air Bus-თან ექსკლუზიური თანამშრომლობის შეთანხმება გააფორმა. ახალი ეროვნული ავიაკომპანიის გეგმებზე რადიო „კომერსანტის“ ეთერში კომპანიის თანადამფუძნებლებმა თენგიზ ტყეშელაშვილმა და ირაკლი გიორგობიანმა ისაუბრეს. მათი თქმით, Air Iveria საერთაშორისო მიმართულებებთან ერთად შიდა ბაზრის სრულად ათვისებას გეგმავს, მათ შორის ქუთაისის, მესტიისა და თელავის აეროპორტებში ოპერირებას.

„ჩვენი მიზანია, რომ სრულად და სწორად ავითვისოთ საქართველოს აეროპორტების ინფრასტრუქტურა, მათ შორის ქუთაისის, მესტიის, ბათუმის, თელავის აეროპორტების გაუმჯობესება-ათვისება. ლაპარაკია ასევე ახალი აეროპორტების მშენებლობაზე, რომელსაც ეკონომიკის სამინისტრო გეგმავს, მათ შორის ანაკლიაში, შესაძლოა განხილული იქნას ქობულეთში აეროპორტის მშენებლობაც. შიდა ტურიზმის განვითარების განვითარება ჩვენთვის ძალიან მნიშვნელოვანია. ასე საქართველოს შემოვლას 9-10 საათის ნაცვლად 1 საათში შევძლებთ,“ - განაცხადა თენგიზ ტყეშელაშვილმა.

ირაკლი გიორგობიანის თქმით, შემდეგი 2 თვის განმავლობაში კომპანიის მოკლევადიანი და გრძელვადიანი გეგმების ფორმირება მოხდება და ამის შემდეგ მის იმპლემენტაციას დაიწყებენ.

 „ჩვენი მიზანია, რომ 2024 წლიდან დავიწყოთ ოპერირება. ურთიერთობა დავამყარეთ Air Bus-თან, გვინდა მათი გამოცდილება, ცოდნა გაგვიზიარონ, სწორად მოხდეს როგორც არსებული მიმართულებების, ასევე პოტენციური ბაზრები შეფასება. შემდეგი 2 თვის განმავლობაში უკვე ფორმირებული იქნება ჩვენი მოკლევადიანი და გრძელვადიანი გეგმები და მერე მის იმპლემენტაციას დავიწყებთ და სავსებით რეალურია გეგმა, რომ 2024 წელს დავიწყოთ ოპერირება“, - აცხადებს Air Iveria-ს თანადამფუძნებელი ირაკლი გიორგობიანი.

მათი თქმით, Air Iveria-ს კონკურენტული უპირატესობა მგზავრის კომფორტზე და შეთავაზებულ სერვისზე ორიენტირებაა.

„ჩვენ სრულად ვიქნებით ორიენტირებული მგზავრის კომფორტზე და შეთავაზებულ სერვისზე. ახალი სიტყვა გვინდა ვთქვათ არა მხოლოდ საქართველოს და რეგიონულ, არამედ მსოფლიო ბაზარზე, ჩვენი კლიენტი არის ჩვენი მეფე. ეს არის ჩვენი მთავარი კონკურენტული უპირატესობა. ამ კუთხით ჩვენ კონკურენტებს კი არ უნდა შევეჯიბროთ, ახალი პროდუქტი უნდა შევქმნათ“, - განაცხადა თენგიზ ტყეშელაშვილმა.

მისივე თქმით, სბაზარზე ეროვნული ავიახაზების გამოჩენით აქართველოს რეგიონულ ჰაბად ქცევის პოტენციალი აქვს, ავიაკომპანიასთან ერთად, მასთან მიბმული „ეკოსისტემაც“ განვითარდება და ამით საქართველოს 2-დან 3 მლრდ დოლარამდე შეემატება.

„საქართველო გეოგრაფიულად კარგი მდებარეობა აქვს და აქვს პოტენციალი, რომ რეგიონულ-სატრანსპორტო, ლოგისტიკურ, გადაზიდვების ჰაბად იქცეს. ქვეყნისთვის ძალიან მნიშვნელოვანია, რომ არსებობდეს ეროვნული ავიაკომპანია, რომელიც ეკოსისტემას განავითარებს და შექმნის. უნდა წარმოვიდგინოთ, რომ ავიაკომპანიასთან ერთად განვითარდება პირდაპირ და არაპირდაპირ მასთან მიბმული სექტორები, მათ შორის ინჟინერია, ტექნოლოგიური ბაზა, აეროპორტები, ლოჯისტიკური გადაზიდვის ცენტრები, მცირე და საშუალო ზომის ასაწყობი საწარმოები და რაც ყველაზე მნიშვნელოვანია ეს ხელს უწყობს ჰუმანური კაპიტალის - მუშახელის პროდუქტიულობის ზრდას. ამით ჩვენს ქვეყანას შეიძლება შეემატოს 2-დან 3 მლრდ დოლარამდე ექსპორტიდან, რაც შეცვლის ქვეყანაში საგადასახადო ბალანსს და იმპორტის ქვეყნიდან გადავიქცევით ექსპორტის ქვეყნად,“ - აცხადებს თენგიზ ტყეშელაშვილი.