2022 წლის აგვისტო არ იყო ისეთი აქტიური თბილისის Airbnb ბაზრისთვის, როგორც თავდაპირველად მოსალოდნელი იყო. ამის შესახებ „თიბისი კაპიტალის“ პუბლიკაციაში „საცხოვრებელი უძრავი ქონება თბილისში“ არის აღნიშნული.
Airbnb-ზე აქტიური განცხადებების რაოდენობა აგვისტოში წინა თვესთან შედარებით კიდევ უფრო შემცირდა (-2.5%). ეს მაჩვენებელი დარჩა პანდემიამდელ დონეზე. ერთხელ მაინც დაჯავშნილი ქონების რაოდენობაზეც დაფიქსირდა კლება (- 3,7%) 2019 წლის მაჩვენებელთან შედარებით. გარდა ამისა, დაჯავშნილი ღამეების რაოდენობა 2019 წლის დონეს 25%-ით ჩამორჩა.
დაბალი მიწოდების გამო, დაკავებულობის კოეფიციენტი გაუმჯობესდა აგვისტოში და გადააჭარბა წინა თვესა და პანდემიამდელ დონეს, შესაბამისად, 4 პროცენტით და 37 პროცენტით. მიუხედავად იმისა, რომ გაუმჯობესდა მთლიანი ბაზრის შემოსავალი (+1.8%), წლიური მაჩვენებელი 13%-ით ნაკლებია 2019 წლის აგვისტოსთან შედარებით.
ბოლო სიტუაციისა და იმიგრაციის შემდგომი ზრდის შესაძლებლობის გათვალისწინებით, ბინის გაზიარების ბაზარმა შესაძლოა გაიმეოროს ტენდენციები, რომლებიც დაფიქსირდა 2022 წლის მარტ-მაისში: Airbnb-ზე რეგისტრირებული ბინების ზოგიერთი მფლობელი გადადის ტრადიციულ (გრძელვადიან) გაქირავებაზე, ამიტომ ამცირებს Airbnb ქონების მიწოდებას ბაზარზე.
„თიბისი კაპიტალის“ ინფორმაციით, ლარის ნომინალური გამყარება აშშ დოლართან მიმართებაში იყო ერთ-ერთი ფაქტორი, რომელიც დადებითად მოქმედებდა გაყიდვისა და იჯარის ფასებზე აგვისტოში. ასევე, საზღვრის გადაკვეთის, უნაღდო დანახარჯებისა და არარეზიდენტების მიერ საქართველოს ბანკებში ანგარიშის გახსნის შესახებ მონაცემები მიუთითებს იმაზე, რომ მიგრანტები საქართველოში უფრო დიდხანს დარჩებიან, ვიდრე ეს ადრე იყო მოსალოდნელი. ომის გახანგრძლივებამ, რუსეთის წინააღმდეგ ეკონომიკურმა სანქციებმა და ევროკავშირის მიერ რუსეთის მოქალაქეებისთვის სავიზო რეჟიმის გამარტივების შეჩერებამ, შესაძლოა საქართველოში მიგრანტების ახალი ტალღების ნაკადი გამოიწვიოს.