კომპანია Airbus გეგმავს მომდევნო თვეების განმავლობაში სრულად თქვას უარი რუსული ტიტანის გამოყენებაზე. ამის შესახებ სააგენტო Reuters-ი წერს.

„ჩვენ ვიმყოფებით რუსეთიდან გამოყოფის სტადიაში ტიტანის საკითხში. ეს საკითხი თვეებს საჭიროებს და არა წლებს. ამ დროისთვის Airbus კვლავინდებურად ყიდულობს გარკვეული ოდენობის ტიტანს რუსეთისგან, თუმცა ჩვენ ვადგავართ მასზე სრულად უარის თქმის გზას“, - განაცხადა Airbus Defence and Space განყოფილების გენერალურმა დირექტორმა მიხაილ შოლჰორნმა.

მისი თქმით, კომპანიამ უკვე სრულად თქვა უარი რუსული ტიტანის გამოყენებაზე სამხედრო თვითმფრინავების წარმოებაში, ხოლო სამოქალაქო სექტორში რუსულ ნედლეულზე უარის სათქმელად კომპანიას გარკვეული დრო დასჭირდება.

სააგენტოს მონაცემებით, კონცერნმა გაზარდა ამერიკიდან და იაპონიიდან ტიტანის შესყიდვები. საუბარია ახალი მომწოდებლების სერტიფიცირებაზე, თუმცა ამას შეიძლება წლები დასჭრიდეს იმის გამო, რომ აეროკოსმოსურ მრეწველობაში მოქმედებს უმკაცრესი სტანდარტები.

Airbus-მა რუსული ტიტანის სანაცვლოდ სხვა წყაროების მოძიების შესახებ ჯერ კიდევ 2022 წლის მარტში განაცხადა. მაშინ ითქვა, რომ ეს ნაბიჯი გადაიდგემოდა ერთგვარი დაზღვევისთვის, თუ რუსეთიდან შეწყდებოდა ტიტანის იმპორტი.