Airbus-მა, რომელიც ევროპაში თვითმფრინავების ყველაზე მსხვილი მწარმოებელია, განაცხადა, რომ წყვეტს რუსეთის ავიაკომპანიებისთვის სათადარიგო ნაწილების მიწოდებას. ასევე ის განიხილავს, შეუძლია თუ არა მოსკოვის საინჟინრო ცენტრს რუსეთის კლიენტების მომსახურების გაგრძელება ამჟამინდელი სანქციების პირობებში, რომლებიც დასავლეთმა დაუწესა რუსეთს უკრაინაზე თავდასხმის საპასუხოდ.
მანამდე უმსხვილესმა ამერიკულმა ავიაკომპანია Boeing-მა განაცხადა, რომ წყვეტს რუსეთის ავიაკომპანიების უზრუნველყოფას და მოსკოვში თავის საქმიანობას.
როგორც Reuters-ი იტყობინება, სანქციები რუსეთის ავიაბაზრის იზოლაციას იწვევს ისე, როგორც ეს ხდება ირანისა და ჩრდილოეთ კორეის შემთხვევაში, მაგრამ ბევრად უფრო მასშტაბური შედეგები ექნება, ვინაიდან რუსეთის ბაზარი უფრო დიდი და უფრო დამოკიდებულია დასავლეთის მიმწოდებლებზე.
უკრაინაზე თავდასხმის გამო, რუსეთის ეკონომიკის, საფინანსო სისტემის, ხელისუფლების და მასთან დაახლოებული პირების წინააღმდეგ სერიოზული სანქციები აამოქმედეს ევროკავშირმა, აშშ-მა, დიდმა ბრიტანეთმა და სხვა სახელმწიფოებმა. რუსეთისთვის სანქციებით გამოცხადებული ბრძოლის გარდა, დასავლეთი უკრაინას უწევს ფინანსურ და სამხედრო დახმარებას.
Airbus
