უსაფრთხოებისა და ანტიკორუფციული ფედერალური პროექტის ხელმძღვანელმა ვიტალი ბოროდინმა რუსეთის გენერალურ პროკურატურას მიმართა და მოითხოვა გადაამოწმონ, აფინანსებს თუ არა რუსი მომღერალი ალა პუგაჩოვა უკრაინის შეიარაღებული ძალებს. ამის შესახებ რუსული მედია წერს.

თავის განცხადებაში ის აღნიშნავს, რომ ამჟამად ისრაელში მცხოვრები პუგაჩოვა აგრძელებს უკრაინაში რუსეთის მიერ წარმოებული „სპეცოპერაციის“ კრიტიკას. ასევე, მისი თქმით, პუგაჩოვა მხარს უჭერს კულტურის და ხელოვნების იმ მოღვაწეებს, რომლებმაც დატოვეს რუსეთი, აქტიურად აკრიტიკებენ „სპეცოპერაციას“ და ფინანსურ დახმარებას უწევენ უკრაინას.

„ადრე ფედერალურმა პროექტმა გამოავლინა ალა პუგაჩოვას საქმიანობის უცხოური დაფინანსება და მისი კავშირები დასავლურ სპეცსამსახურებთან,“ - აღნიშნავს ის.

ალა პუგაჩოვა და მისი მეუღლე კომიკოსი მაქსიმ გალკინი უკრაინაში რუსეთის მიერ გაჩაღებული სისხლიანი ომის წინააღმდეგ გამოდიან და კრემლის პოლიტიკას ღიად აკრიტიკებენ.  წყვილმა რუსეთში არა მხოლოდ საკონცერტო საქმიანობა შეწყვიტა, არამედ ბიზნესებიც დახურა. რუსეთის ხელისუფლებამ მაქსიმ გალკინი უცხო ქვეყნის აგენტების სიაშიც შეიყვანა.