ცნობილმა რუსმა მომღერალმა ალა პუგაჩოვამ, რომელმაც უკრაინაში რუსეთის შეჭრის შემდეგ ქვეყანა ოჯახთან ერთად დატოვა და ისრაელში გადავიდა, წინასაახალწლოდ ვიდეო ჩაწერა. სოციალურ ქსელში გავრცელებულ ვიდეომიმართვაში ალა პუგაჩოვა ამბობს, რომ ის ბედნიერი და თავისუფალი ადამიანია და ახალ წელს ახლობელ ადამიანებთან ერთად ხვდება.
ვიდეომიმართვა ინსტაგრამზე მომღერლის ერთ-ერთ ფან-ჯგუფში გავრცელდა. ვიდეოში მომღერალს ყვითელი ქურქი და ცისფერი შარვალი აცვია, ის ბაღში ზის და ამბობს, რომ ამ ახალ წელს მის გარშემო ისეთი ადამიანები არიან, ვისაც სინდისი, პატივი და ღირსება გააჩნიათ.
ჩემი გაგებით, ბედნიერება არის ის, რასაც ახლა ვგრძნობ: თავისუფალი ვარ, ოჯახი ჩემთანაა, ახალ წელს ვხვდები იმ ადამიანების წრეში, ვისაც ჩემი ესმის, ვისაც სინდისი, პატივი და ღირსება გააჩნია“ - აცხადებს პუგაჩოვა.
ალა პუგაგაჩოვას ვიდეომ და ყვითელ-ცისფერმა სამოსმა, რამაც უკრაინის დროშის ასოციაცია შექმნა, რუსეთის მოქალაქეების ნაწილის აღშფოთება გამოიწვია, კრემლის მხარდამჭერებმა ალა პუგაჩოვა რუსეთის ღალატში დაადანაშაულეს.
ალა პუგაჩოვა და მისი მეუღლე კომიკოსი მაქსიმ გალკინი უკრაინაში რუსეთის მიერ გაჩაღებული სისხლიანი ომის წინააღმდეგ გამოდიან და კრემლის პოლიტიკას ღიად აკრიტიკებენ. წყვილმა რუსეთში არა მხოლოდ საკონცერტო საქმიანობა შეწყვიტა, არამედ ბიზნესებიც დახურა. რუსეთის ხელისუფლებამ მაქსიმ გალკინი უცხო ქვეყნის აგენტების სიაშიც შეიყვანა.