„მაღალი რეფინანსირების განაკვეთი ლარში და შეზღუდვა, რომელიც გულისხმობს უცხოურ ვალუტაში იპოთეკური სესხებზე 10 წლამდე ვადის შემცირებას, ასევე სხვა რეგულაციები, მათ შორის რისკის ბუფერის გამოთვლა ცვლად განაკვეთიან სესხებზე, მნიშვნელოვნად აფერხებს იპოთეკური სესხების გაცემას. რეალურად იპოთეკური სესხების ზრდის ტემპი წლის დასაწყისიდან მნიშვნელოვნად არის შემცირებული, მიუხედავად იმისა, რომ უძრავი ქონების ბაზარზე ტრანსაქციების რაოდენობას აღნიშნული არ დაეტყო“, — ამის შესახებ განაცხადა საბანკო ასოციაციის პრეზიდენტმა ალექსანდრე ძნელაძემ გადაცემაში „ბიზნესი რუსთავი 2“-ზე.

მისი თმით, რეალურად, თუ უძრავი ქონების ბაზარს შესაძლოა რაიმე საფრთხე დაემუქროს, არსებობს უკვე ინსტრუმენტები რომლებიც ხელს შეუწყობს ამ მიმართულებით გააქტიურებას, მაგრამ ძნელაძის აზრით, მოკლევადიან პერიოდში უძრავი ქონების ბაზარზე ფასების ცვალებადობა მოსალოდნელი არ არის.

„უფრო მეტად დასტაბილურებას ველოდებით იჯარის ნაწილში, რადგან რაღაც პერიოდის განმავლობაში ის საერთოდ არ იზრდებოდა, მიუხედავად იმისა რომ უძრავი ქონების ფასი მზარდი ხასიათის იყო, დღეს რადიკალურად შეიცვალა მდგომარეობა და მკვეთრი ზრდაა იჯარის ღირებულებებზე. ამ მიმართულებით, თეორიულად ველოდებით, რომ გარკვეული კორექტირებები შეიძლება იყოს, მოთხოვნის კორექტირებასთან ერთად, მაგრამ მეორე თვალსაზრისით კარდინალურ ცვლილებას მაქაც არ ველოდებით, რადგან ერთი არის რომ მოთხოვნა გაიზარდა და აქედან გამომდინარე გაიზარდა იჯარის ფასები, მაგრამ მეორე, უნდა შევხედოთ რომ ორი წლის განმავლობაში ამ მიმართულებით არ არსებობდა არც მოთხოვნა და არც ფასების კარდინალური ცვლილება, პირიქით გარკვეულ რაიონებში შემცირებაც კი იყო დაფიქსირებული.

დღეს ტურიზმის და მიგრაციის თვალსაზრისით საკმაოდ მაღალი მაჩვენებლები გვაქვს. ტურისტის გაჩერების ვადა გაგრძელდა ქვეყანაში და თითო ადამიანიდან ხარჯიც გაიზარდა. მომავალ წელს სრულად აღდგენასაც პროგნოზირებენ ამ თვალსაზრისით, ამიტომ ცალსახად რომ ვთქვათ, რაიმე პრობლემას ველოდებით უძრავი ქონების კუთხით არ ვფიქრობ რომ იქნება. თუმცა სხვადასხვა მიმართულებით გარკვეულ კოექტირებებს გამოიწვევს, რადგან რეგიონში არასტაბილური სიტუაციაა და ნებისმიერმა მერყეობამ შესაძლოა გავლენა მოახდინოს. დღეს უძრავმა ქონებამ აღიდგინა მაღალი საინვესტიციო ინტერესი, რაც იმის წინაპირობა არის რომ შემდეგ პერიოდში აღნიშნულ ბაზარზე მოქმედება სტაბილურად უნდა გაგრძელდეს“, — ამბობს ალექსანდრე ძნელაძე.

აღსანიშნავია, რომ „თიბისი კაპიტალის“ ინფორმაციით, თბილისის საცხოვრებელმა ბაზარმა 2022 წლის აგვისტოში ახალ მაჩვენებლებს მიაღწია. ტრანზაქციების რაოდენობა წლიურად 26.9%— ით გაიზარდა. საშუალო მოთხოვნადი გასაყიდი ფასი 26,5%-ით გაიზარდა, 2021 წლის ანალოგიურ პერიოდთან შედარებით. 2022 წლის მაისიდან თანდათანობითი კლების შემდეგ, ქირავნობის მოთხოვნამ შეცვალა ტენდენცია, მიაღწია აქამდე უმაღლეს წერტილს და გადააჭარბა კიდეც აგვისტოში ივლისის თვის მაჩვენებელს 7.9%-ით, ხოლო წლიური მონაცემებით ზრდამ 79,2% შეადგინა.