საქართველოშიც მოსალოდნელია, რომ დინამიკაში ეპიდვითარება გაუარესდება. მნიშვნელოვანია, თუ როგორი რეაგირება იქნება როგორც სახელმწიფოს მხრიდან, ასევე საზოგადოების, თუ რას გავაკეთებთ ჩვენ იმისთვის, რომ რაც შეიძლება ნაკლები დანაკარგით გადავიტანოთ ჩვენ ეს ტალღა, - ასე აფასებს ეპიდვითარებას მედიაჰოლდინგ „კვირას“ პრესკლუბში გამართულ პრესკონფერენციაზე ინფექციონისტი ალექსანდრე გოგინავა.
როგორც ინფექციონისტი განმარტავს, არსებითად მნიშვნელოვანია ვაქცინაციის პროცესის გააქტიურება და ასევე ყველა რეკომენდაციის ზედმიწევნით შესრულება, რომ არ მოხდეს „ომიკრონის“ კიდევ უფრო სწრაფი გავრცელება. იგი ასევე გასცემს რეკომენდაციებს ახალი შტამის სწრაფი გავრცელების თავიდან ასარიდებლად.
„ეპიდსიტუაცია საკმაოდ საყურადღებოა, ამაზე მეტყველებს ყველა ის მაჩვენებელი, რაც გვაქვს ამ ბოლო პერიოდში. მსოფლიოში გაუარესდა ეპიდსიტუაცია და საქართველოშიც მოსალოდნელია, რომ დინამიკაში კიდევ უფრო გაუარესდეს. ძალიან მნიშვნელოვანია, თუ რა რეაგირება მოჰყვება როგორც სახელმწიფოს მხრიდან, ასევე საზოგადოების მხრიდან, თუ რას გავაკეთებთ ჩვენ იმისთვის, რომ რაც შეიძლება ნაკლები დანაკარგით გადავიტანოთ ეს ტალღა.
ჩემი აზრით, ყველაზე მნიშვნელოვანი არის ვაქცინაციის პროცესი, მით უმეტეს ვიცით, რომ დღეს განახლდა სასწავლო პროცესი, რაც მობილობას კიდევ უფრო გაზრდის და მობილობის გაზრდა რა თქმა უნდა ეპიდემიების და პანდემიების დროს არის რისკების შემცველი. ასევე მნიშვნელოვანია ის ფაქტორიც, რომ მოზარდების დიდი ნაწილი არ არის ვაქცინირებული, რამაც შეიძლება კიდევ უფრო ხელი შეუწყოს დაავადების სწრაფ გავრცელებას. ჩვენი რეაგირება უნდა იყოს პირველ რიგში ვაქცინაციის პროცესის აქტიური წარმართვა, არსებული რეკომენდაციების ზედმიწევნით კარგად დაცვა. „ომიკრონი“ უფრო სწრაფად ვრცელდება, ვიდრე „დელტა“ შტამი და უფრო მკაცრად უნდა გავითვალისწინოთ ის რეკომენდაციები, როგორიც არის პირბადის გამოყენება, ფიზიკური დისტანცირება, თავშეყრის ადგილებისგან თავის შეკავება, თუ ამის სასიცოცხლო აუცილებლობა არ არის“, -განაცხადა გოგინავამ.
ამასთან, ინფექციონისტი განმარტავს, ახალ, „ომიკრონ“ შტამს არ აქვს რთული მიმდინარეობა და გამომდინარე აქედან, ჰოსპიტალიზაციის რისკები.
„საერთაშორისო კვლევები, ჩვენი უკვე არსებული პრაქტიკული გამოცდილება აჩვენებს, რომ „ომიკრონს“ მეტნაკლებად უფრო მსუბუქი მიმდინარეობა ახასიათებს და დაახლოებით ორჯერ არის შემცირებული ჰოსპიტალიზაციის რისკები „ომიკრონის“ დროს, ვიდრე ეს იყო „დელტა“ შტამისას. ასევე „ომიკრონს“ ნაკლებად ახასიათებს ფილტვების დაზიანება. აქედან გამომდინარე „ომიკრონი“ შეიძლება შევაფასოთ, რომ კლინიკური მიმდინარეობით არის უფრო მსუბუქი, მაგრამ ამის აღქმა ისე, რომ თითქოს არანაირ საფრთხეს არ წარმოადგენს და ყველა ადამიანი, ვისაც დაემართება წავა მსუბუქად, გრიპის მსგავსი სიმპტომებით, ეს ასე არ არის“, - განაცხადა ალექსანდრე გოგინავამ.
IPN.GE