ვლადიმირის რაიონის მაღალი უსაფრთხოების მე-6 კოლონიაში მყოფმა რუსმა ოპოზიციონერმა პოლიტიკოსმა ალექსეი ნავალნიმ, თავისი სოციალურ ქსელებით გაავრცელა ცნობა, რომ ის სასჯელაღსრულების საჯარიმო იზოლატორში მოათავსეს.

"მივესალმოთ ყველას საჯარიმო იზოლატორიდან. ნამდვილი პროფკავშირული ბრძოლა არასოდეს არის ადვილი, რომ აღარაფერი ვთქვათ პროფკავშირზე ციხეში. კრემლს სურს იხილოს მდუმარე მონებისგან შემდგარი თავისი გულაგი. და აი, იმის ნაცვლად, რომ მოწყალება ვითხოვო, ვიღაცას ვაერთიანებ და გარკვეული კანონების დაცვას მოვითხოვ,"- წერს ნავალნი.

მსჯავრდადებული რუსი ოპოზიციონერის თქმით "ბარაკის კომისიაზე" იგი გამოიძახეს თითქოს იმის გამო, რომ "პრომზონის სათვალთვალო ვიდეოზე გამოჩნდა, რომ პატიმარს რეგულარულად აქვს ზედა ღილების გახსნილი სპეციალური ტანსაცმელზე. "ეს, ცხადია, მე მახასიათებს როგორც გამოუსწორებელ ბოროტმოქმედს. ამიტომ მიიღეს გადაწყვეტილება, რომ გამაგდონ საჯარიმო იზოლატორში. ჯერ-ჯერობით სამი დღე-ღამით. მაგრამ, თუ მე არ შევცვლი გადაწყვეტილებას, მაშინ საჯარიმო იზოლატორი ჩემ მუდმივ რეზიდენციად იქცევა", - წერს ნავალნი.

ნავალნიმ მანამდე პატიმართა და კოლონიების თანამშრომელთა პროფკავშირი შექმნა. პროფკავშირმა, როგორც მან თქვა, უკვე მოახერხა პირველი შედეგების მიღწევა: სამკერვალო საამქროში ტაბურეტები ზურგიანი სკამებით შეცვალეს.

ამის შემდეგ, როგორც პოლიტიკოსმა თქვა, მას ყოველდღიურად იბარებდნენ სადისციპლინო კომისიაში და ასევე გადასცეს "გაფრთხილება მოსალოდნელი დანაშაულის შესახებ." საჯარიმო საკანში, მისი თქმით, ის აპირებს დაწეროს ინსტრუქციები პატიმრებისთვის სამუშაო ადგილზე მათი უფლებების შესახებ.

რუსეთის ოპოზიციის ლიდერი ალექსეი ნავალნი საერთო რეჟიმის შრომა-გასწორების კოლონიიდან, რომელშიც პირველ ვადას იხდიან პატიმრები, გადაიყვანეს მკაცრი რეჟიმის კოლონიაში, ვლადიმირის ოლქის ქალაქ მელეხოვოში. ამის შესახებ ნავალნიმ 15 ივნისს განაცხადა სოციალურ ქსელებში.

2021 წელს ნავალნის პირობითი პატიმრობა რეალურით შეუცვალეს „ივ როშეს“ საქმესთან დაკავშირებით და ვლადიმირის ოლქში, პოკროვის მე-2 კოლონიაში გაგზავნეს. მარტში მოსკოვის ლეფორტოვოს რაიონულმა სასამართლომ მას 9 წლით მკაცრი რეჟიმის კოლონიაში პატიმრობა მიუსაჯა, თაღლითობისა და სასამართლოსადმი უპატივცემულობის გამო. პოლიტიკოსის მომხრეებს ეჭვი არ ეპარებათ, რომ ის მხოლოდ და მხოლოდ პოლიტიკური მოტივებით იდევნება.

მელეხოვოს მე-6 კოლონიის პატიმრები წამების შესახებ ჩიოდნენ ხოლმე. შარშან მარტში „მედიაზონამ“ გამოაქვეყნა ნაწყვეტები ყოფილი პატიმრის, ივან ფომინის წერილებიდან, რომლებშიც ის აღწერს ცემის, წამებისა და სექსუალური ძალადობის შემთხვევებს. ნავალნიმ ჯერ კიდევ გაზაფხულზე შეიტყო, რომ მელეხოვოში გადაყვანას უპირებდნენ. როგორც მაშინ აცხადებდა, პატიმრებმა მას შეატყობინეს, რომ ამ კოლონიაში ოპოზიციონერისთვის ამზადებენ „ციხეს ციხეში".

Radiotavisupleba.ge