წინდების მწარმოებელი ქართული კომპანია „ალტერსოქსი“ იტალიის ბაზარზე გავიდა. როგორც კომპანიის თანადამფუძნებელი რეზი ბესელაშვილი „ბიზნესპარტნიორთან“ აცხადებს, სიცილიაში „ალტერსოქსის“ რამდენიმე საკმაოდ დიდი პარტია იქნა გაგზავნილი.

„სიცილია, ეს იყო ყველაზე მსხვილი ექსპორტი, რაც აქამდე განგვიხორციელებია, თუმცა ჩვენ და ჩვენს პარტნიორს მომავალი წლისთვის, უფრო ამბიციური გეგმები გვაქვს. გარდა ამისა, ამერიკელ პარტნიორებთან ერთად, უკრაინელი დიზაინერის ნამუშევრების მიხედვით შევქმენით წინდები, რომლის პირველი პარტიაც ახლა გაიგზავნება ამერიკაში და გაიყიდება საქველმოქმედო მიზნებით, უკრაინელების მხარდასაჭერად. კამპანიის ფარგლებში, გეგმაშია 10,000-მდე წყვილის გაგზავნა“ - აცხადებს ბესელაშვილი.

„ალტერსოქსის” პროდუქცია 15-მდე ქვეყანაში გადის ექსპორტზე. მათ შორის, ევროპასა და ამერიკაში. კომპანიის მიერ წარმოებული წინდები გერმანულ Amazon-ზე, წინდების ერთ-ერთი კატეგორიის ბესტსელერია.

გარდა გერმანიისა, ალტერსოქსს“ მომხმარებლები ჰყავს საფრანგეთის ბაზარზეც, სადაც ბრენდი ფრანჩაიზის სახით 2 წლის წინ შევიდა.

„ალტერსოქსის“ თანადამფუძნებელი გაყიდვებზეც საუბრობს და აცხადებს, რომ კომპანიის შემოსავლები დაუბრუნდა პანდემიამდელ მაჩვენებლებს, თუმცა, გაზრდილი ხარჯის გამო მოგება დრამატულად შემცირებულია.

შეგახსენებთ, „ალტერსოქსი“ ქართველი ცოლ-ქმრის ორიგინალური სტარტაპია, რომელიც დაახლოებით 7 წლის წინ გამოჩნდა ქართულ ბაზარზე. კომპანია მომხმარებლებს გამორჩეულ, ფერად და სახალისო წინდებს სთავაზობს.

დღეს „ალერსოქსი“ თბილისის ბაზარზე 6 სტენდითაა წარმოდგენილი. კომპანია ბათუმში ფლობს 1 ბრენდულ მაღაზიას და ასევე, საქართველოში პირველ და ერთადერთ ვენდინგ მანქანას თბილისის საერთაშორისო აეროპორტში.

ბიზნესპარტნიორი