მყინვარწვერისკენ მიმავალ გზაზე, რომელსაც წლის განმავლობაში უამრავი ადამიანი სტუმრობს, ზღვის დონიდან 3700 მეტრზე ახალი სამთო-სამაშველო სახლის (ქოხი, ე.წ. შალე) განთავსება იგეგმება. პროექტის ავტორები მყინვარის მისადგომებთან, ზღვის დონიდან 3014 მეტრზე მდებარე სამთო ქოხის „ალტიჰატის“ დამფუძნებლები არიან.

ახალი ინფრასტრუქტურა განკუთვნილია გადაუდებელი და დაუყოვნებელი სამთო-სამაშველო მომსახურებისთვის, სადაც ადგილზე 15 ადამიანი განთავსდება, მათ შორის 4 პროფესიონალი სამთო მაშველი და პარამედიკოსი მუდმივად იმორიგევებს.

სამაშველო ქოხი სრულად იქნება აღჭურვილი თანამედროვე სამედიცინო ტექნიკით, რომელიც როგორც პირველად სამედიცინო დახმარებას, ასევე დაზარალებული პაციენტის ტრანსპორტირებისთვის მომზადებას და სხვა გადაუდებელი სამედიცინო მანიპულაციის ჩატარებას უზრუნველყოფს.

პროექტში „ალტიჰატის“ პარტნიორი შვეიცარიული კომპანია „ბალია“ (BALLY), პროექტი კომპანიის გარემოზე ზრუნვის ფონდის - „ბალი პიკ აუთლუქ ფაუნდეიშენის“ ფარგლებში ხორციელდება.

როგორც „კომერსანტთან“ საუბრისას „ალტიჰატის“ დამფუძნებელმა ნიკოლოზ ალავიძემ აღნიშნა, აღნიშნული პროექტი საქართველოს მისცემს საშუალებას, რომ გლობალურ რუკაზე მნიშვნელოვნად წარმოჩინდეს.

„ჩვენი პარტნიორობა თითქმის 200 წლის ისტორიის მქონე  შვეიცარიულ კომპანია „BALLY“–სთან შედგა და ამ პროექტს ერთობლივად ვახორციელებთ. პროექტის ფარგლებში კომპანიის წარმომადგენლებს გავაცანით ჩვენი გეგმები, გავაფორმეთ მემორანდუმი და ვაკეთებთ ახალ სამაშველო ქოხს, თვითონ პროექტი, როგორც „ალტიჰატის“ შემთხვევაში მოხდა, შვეიცარიაში მომზადდება, შემდეგ აქ ჩამოვლენ და ააშენებენ. არქიტექტურაზე კონკურსი შვეიცარიის სამხატვრო აკადემიაში და არქიტექტურის სასწავლებლებში გამოვაცხადეთ. გამომდინარე იქიდან, რომ ამხელა სიმაღლეზე ხდება მშენებლობა, ძალიან ბევრი ტექნიკური დეტალია გასათვალისწინებელი.

მყინვარწვერის შემთხვევაში სამთო-სამაშველო სამსახური არ არსებობს, სამაშველო სამსახური არის გუდაურში და ყაზბეგში, ასევე ბოლო რამდენიმე წელია პოლონელი მოხალისე მაშველები პატრულირებენ, მაგრამ როდესაც 3000 მეტრის სიმაღლეზე ხდება შემთხვევა, ოპერატიულობა ძალიან მნიშვნელოვანია, სწრაფი რეაგირება ვერ ხდება და ჩვენი მიზანი სწორედ ის არის, რომ ადამიანს პირველადი დახმარება დროულად აღმოვუჩინოთ და სანამ მაშველები ამოვლენ, ევაკუაციისთვის მოვამზადოთ.“— აღნიშნა ნიკოლოზ ალავიძემ.

როგორც ნიკოლოზ  ალავიძე ამბობს, არათუ საქართველოს ისტორიაში, არამედ კავკასიონზე მსგავსი  შენობა, მსგავს  სიმაღლეზე არ აშენებულა, ერთადერთი ასეთი შენობა მეტეოსადგურის შენობაა, რომელიც 40-იან წლებში აშენდა.

„სამთო შალე, ზღვის დონიდან 3700 მეტრზე ისტორიაში პირველი შენობა იქნება, რომელიც ტურისტს თუ ადგილობრივ მთამსვლელს მსგავსი ტიპის მომსახურებას გაუწევს, ერთადერთი შენობა რომელიც 40 -იან წლებში აშენდა იყო მეტეოსადგური, რომლითაც ძალიან კარგი საქმე  გაკეთდა. რამდენიმე წლის წინ ჩვენ ზღვის დონიდან 3014 მეტრზე  თანამედროვე ინფრასტრუქტურის მქონე სამთო ქოხი „ალტიჰატი“ გავაკეთეთ, სწორედ „ალტიჰატმა“ გამოიწვია ამ კომპანიის დაინტერესება და ჩვენთან ერთად სამთო ქოხზე მუშაობის სურვილი.“— აღნიშნა ნიკოლოზ ალავიძემ.

როგორც ალავიძე აცხადებს, სამთო ქოხი „ალტიჰატის“ დამფუძნებლების პირადი ინვესტიციით მოეწყობა და ადგილობრივ ბიზნესს და  ქართველ გიდებს მეტ შესაძლებლობას მოუტანს, მისივე  თქმით,  მყინვარწვერის დასალაშქრად ჩამოსული უცხოელი მაღალმხარჯველი ტურისტისთვისაც ძალიან მნიშვნელოვანია, რომ მათ მოწესრიგებული გარემო დახვდებათ და ეს  საქართველოს ცნობადობის  გაზრდასაც  უფრო მეტად  შეუწყობს ხელს.

სამთო „ქოხი“  ძირითადად ქართველებს დაასაქმებს, თუმცა 10 ევროპელი პროფესიონალი ქართველი საფეხმავლო გიდების და მაშველების მომზადებაში აქტიურად იქნება ჩართული.

სამთო ქოხი „ალტიჰატი“ ყაზბეგის რაიონში მყინვარწვერის მისადგომებთან  ზღვის დონიდან 3014 მეტრზე, პირველ სააკლიმატიზაციო ბანაკთან  „საბერწეზე“ მდებარეობს .„ალტიჰათი“  არის შვეიცარული  ხარისხის, ევროპული სტანდარტების  ქოხი,  რომელსაც შეუძლია ჯამში 35 ადამიანს უმასპინძლოს.

იდეა 2015 წელს სამ მეგობარს პროფესიით ბანკირ ნიკოლოზ ალავიძეს,  ინჟინერ - მშენებელ  დავით  ჭიჭინაძეს და სამთო -  სამაშველო  სამსახურის დამფუძნებელს მამუკა  ნიკოლაძეს გაუჩნდა და ევროპული პრაქტიკის საქართველოში დანერგვა გადაწყვიტეს.

თაკო კვაჭანტირაძე