საავტომობილო ბიზნესში სიტუაცია სტაბილურია. იმპორტიორების თქმით, ამ ეტაპისთვის იმპორტის კუთხით კარგი მდგომარეობაა, მაგრამ ბევრად უკეთესია ექსპორტის და რეექსპორტის მიმართულებით. როგორც „კომერსანტთან“ ავტო იმპორტიორი და „იამოტოს“ ხელმძღვანელი პაატა მაისურაძე ამბობს, შეიძლება ითქვას, რომ წინა წელთა შედარებით მოთხოვნა 100%-ით არის გაზრდილი, რაც შეეხება რეექსპორტს, მიუხედავად ომისა, უკრაინა ავტომანქანებს მაინც აქტიურად ყიდულობს.
„შეიძლება ითქვას, რომ დღეის მდგომარეობით ავტო ბიზნესი ყვავის. კარგი მდგომარეობაა იმპორტის კუთხით, მაგრამ უკეთესად მუშაობს ექსპორტი და რეექსპორტი. წინა წელს, რომ შევადაროთ შეიძლება თქვას, რომ მოთხოვნა 100%-ით არის გაზრდილი. ძირითადად მოთხოვნადი ბრენდებია Toyota, Mercedes, Volkswagen. მიუხედავად ომისა, უკრაინა ავტომანქანებს აქტიურად ყიდულობს.
რაც შეეხება ფასებს, საკმაოდ გაზრდილია ოღონდ არა ჩვენი ბაზრიდან გამომდინარე, ზოგადად მსოფლიო ბაზარზე ფასების საკმაოდ დიდი პროცენტთ ზრდის ტენდენცია შეინიშნება. ეს გამომდინარეობს იქიდან, რომ კოვიდ პანდემიის შემდეგ საავტომობილო ბიზნესში საკმაოდ დიდი ცვლილებებია, ამას ემატება ლოგისტიკური კუთხით და საზღვაო გადაზიდვების კუთხით ფასის მატება. ბოლო 5 წლის ჭრილში შეიძლება ვთქვათ, რომ ავტომანქანების ფასი 25 -30%-ით არის გაზრდილი. რეექსპორტი ზოგადად უკრაინის სომხეთის და რუსეთის მიმართულებით ხორციელდება“, - აღნიშნა პაატა მაისურაძემ.
„რობანი მოტორსის“ დამფუძნებელი ელგუჯა ჯამაგიძე ამბობს, რომ რუსეთის უკრაინაში შეჭრამ ზოგადად ავტო ბიზნესზე იმოქმედა, თუმცა ეს გავლენა მის კომპანიაზე დიდად არ ასახულა, რადგან კონკრეტულ სეგმენტზე მუშაობს.
„ჩვენ ბაზარზე დიდი აქტივობით არ გამოვირჩევით, ჩვენი კონკრეტული სეგმენტი გვყავს, რომელზეც ვმუშაობთ და შესაბამისად ამ სეგმენტს როგორც შეგვიძლია ისე ვატრიალებთ. ამ ეტაპზე რუსეთის უკრაინაში შეჭრამ ზოგადად ბაზარზე იმოქმედა, მაგრამ რეექსპორტის მიმართულებით უზბეკეთი და აზიის ქვეყნები გამოჩნდა, რომლებიც ინდივიდუალურად ეზიდებიან მანქანებს და ამით რაღაცნაირად დაბალანსება ხდება.
რაც შეეხება ადგილობრივ ბაზარს, მომხმარებელი ძირითადად ელექტრონულ კომერციაზეა გადასული და ეს მიმართულება უფრო გააქტიურდა. ბაზარს ასევე დაეტყო რუსების შემოსვლაც, რადგან ბინადრობის უფლებას იღებენ და ავტომანქანებსაც ყიდულობენ. ბაზარი მეტნაკლებად მუშაობს, საბედნიეროდ გაჩერებული არ ვართ და არც უკანსვლა გვაქვს.
იქიდან გამომდინარე, რომ ზოგადად მსოფლიოში გადაზიდვები გაძვირებულია, ასევე უკრაინის ომმა მიწოდების ჯაჭვის შეფერხება გამოიწვია ფასები გაზრდილია. აშშ-ში პანდემიის გამოხმაურება არის ის, რომ ბაზარი ნელ-ნელა პანდემიამდე; ზღვარს უბრუნდება, ჯერჯერობით ავტომობილების ცვლა ნაკლებად ხდება და შესაბამისად ძველ მანქანებზე ფასები იზრდება რაც ჩვენზეც აისახა“, - აღნიშნა ელგუჯა ჯამაგიძემ.
თაკო კვაჭანტირაძე