„რუსეთის მოქალაქეების შემოდინების პირველ ტალღასა და მეორე ტალღის შემთხვევაში სხვადასხვა სურათს ვხედავთ, ჩვენ ვიყავით ერთ-ერთი პირველი კომპანია, რომელმაც დაიწყო ზარების მიღება მანამ სანამ მათ შემოდინებას ვნახავდით“, - ამის შესახებ რადიო „კომერსანტის“ გადაცემაში „კომერსანტის დილა“ უძრავი ქონების სააგენტოს Re/Max Capital დამფუძნებელმა, მარიამ ასათიანმა ისაუბრა.
„მაშინ როდესაც ჩვენ ვამზადებდით ბაზებს უკრაინელებისთვის, რომ მათთვის ბინები დახმარების სახით შეგვეთავაზებინა, რეალურად სხვა სურათი დავინახეთ და განგაშის ზარი შემოვკარით, რუსეთის მოქალაქეებისგან ჩვენ კომპანიაში ზარები არ წყდებოდა, ამ ფაქტს სხვა ბროკერებიც ადასტურებენ. რაც შეეხება მიმდინარე პერიოდს, ამ ეტაპზე პრაქტიკულად მათი მხრიდან მოთხოვნა არ გვაქვს, ვერ ვიტყვი, რომ გაზრდილია, ან პირველ ტალღას რამენაირად უტოლდება, მიჭირს ამის ახსნა, მაგრამ ალბათ დღეს თვისობრივად სხვა სეგმენტი შემოდის , თავიდან ის ხალხი ვინც შემოდიოდა უფრო მომზადებული იყო და ცდილობდნენ საცხოვრებელზე ეზრუნათ. ახლა უფრო ფორსმაჟორულ სიტუაციაში მოდიან და შესაძლოა უფრო დღიურ დაქირავებას მიმართავენ. ჩვენი კომპანიის მაგალითზე ვერ დაგიდასტურებთ, რომ რუსების მხრიდან მოთხოვნა გაზრდილია“, - აღნიშნა მარიამ ასათიანმა.
მარიამ ასათიანის თქმით RE/Max Capital მუშაობას რუტინულად აგრძელებს და რუსეთის მოქალაქეების მიერ მოთხოვნაში არ ჩაბმულა, მისივე თქმით კომპანია პრემიალურ სეგმენტს და უცხო ქვეყნის მოქალაქეებს ემსახურება და რუსეთის მოქალაქეებთან არ თანამშრომლობს.
„ჩვენი კომპანია ძირითადად პრემიალურ სეგმენტის საცხოვრებელი ფართების და კომერციული ფართების გაყიდვა გაქირავებაზე მუშაობს, ჩვენი მომხმარებლები არიან როგორც ქართველები ასევე, ისრაელის, აზერბაიჯანის, თურქეთის ევროპის და აშშ-ს მოქალაქეები. ჩვენ ყველა ჩამოთვლილ ქვეყანაში გვაქვს ოფისები და ხშირად ვცვლით ერთმანეთში ინფორმაციას, შესაბამისად დანამდვილებით შემიძლია გითხრათ, რომ უძრავ ქონებაზე მოთხოვნა მთელ მსოფლიოში საგრძნობლად არის გაზრდილი, რადგან დღეისათვის ყველაზე საიმედო საინვესტიციო გარემო, სწორედ უძრავი ქონების სექტორშია შექმნილი. ადამიანები ცდილობენ, რომ ბანკში ანაბარი არ ჰქონდეთ და ეს თანხა უძრავ ქონებაში დააბანდონ.
უძრავ ქონებაზე გაზრდილი მოთხოვნა კი მთელ მსოფლიოში ფასებს ზრდის და თითქმის ყველა ქვეყანა ადასტურებს, რომ ფასები გაზრდილია და ბაზარიც გააქტიურებულია, ეს ტრენდი ჩვენთანაც გადმოტანილია და უცხოელი ინვესტორებიც ჩვენი რეგიონით აქტიურად ინტერესდებიან, მიუხედავად ომისა მაინც გამოთქვამენ სურვილს რომ თავიანთი ინვესტიცია ჩვენთან დააბანდონ, ამ მიმართულებით ლიდერი ქვეყანა ისრაელია“, - აღნიშნა მარიამ ასათიანმა.
ასათიანის თქმით ყველაზე მოთხოვნადი ბიუჯეტური და პრემიუმ სეგმენტია, მისივე თქმით ბიუჯეტურმა სეგმენტმა აღდგენა პანდემიის წლებში დაიწყო და ტრენდი დღესაც გრძელდება. ხოლო რაც შეეხება ლოკაციებს, მარიამ ასათიანი ამბობს, რომ ყველაზე მოთხოვნადი ცენტრალური უბნებია და ფასებიც სწორედ ამ უბნებში იზრდება.
„აღსანიშნავია, რომ გაზრდილია უძრავი ქონების თვითღირებულებაც და შესაბამისად მშენებლებს ძალიან პატარა მარჟა აქვთ იმისთვის, რომ ფასი დაიჭირონ. თუმცა ფასების ზრდის მიუხედავად მოთხოვნა მაინც არის, შესაბამისად წინაპირობა იმისა, რომ ბაზარზე მოთხოვნა შეჩერდეს და ფასები დაეცეს არ არსებობს. რაც შეეხება სხვა ქალაქებს დღეის მდგომარეობით საინვესტიციო უძრავი ქონების მიმართულებით ყველაზე მოთხოვნადია ბათუმი, გუდაური და ბაკურიანი“, - აღნიშნა მარიამ ასათიანმა.
თაკო კვაჭანტირაძე
Re/max Capital 
