ქათმის ხორცის და კვერცხის მწარმოებელი დიდი კომპანიები, პროდუქტზე ფასის მკვეთრ ცვლილებას არ პროგნოზირებენ. როგორც „კომერსანტს“ მეფრინველეობის განვითარების ასოციაციის თავმჯდომარემ ზურა უჩუმბეგაშვილმა უთხრა, ამ ეტაპზე ქათმის ხორცსა და კვერცხზე ფასები მომატებული არაა. მისივე თქმით, სამომავლოდ რა იქნება, ამაზე პროგნოზის გაკეთება რთულია.
„ჩვენი სექტორი ძირითადად დამოკიდებულია რუსეთის მარცვლეულზე და იქ ხან გადასახადი შემოიღეს, ხან კვოტები შემოიღეს და აქედან გამომდინარე პროგნოზის გაკეთება ძნელია, ყოველ შემთხვევაში აქამდე არც ფასები გაძვირებულა და შევეცდებით, რომ ამ ეტაპზე არც გავაძვიროთ. ჯერჯერობით ფასების დაჭერას ვახერხებთ, ლარი გამყარებულია, თუმცა საწვავი და გადაზიდვები, მომსახურება ძალიან გაძვირებულია და გაიაფებასაც არ აპირებს, თუმცა ფაქტობრივად მთელი წლის განმავლობაში ფასები შენარჩუნებულია “, - აღნიშნა ზურაბ უჩუმბეგაშვილმა.
იმავეს ამბობს კომპანია „ჩირინას“ დამფუძნებელი რევაზ ვაშაკიძეც, მისი თქმით, ბოლო პერიოდში ქათამზე ფასი არ გაძვირებულა და არც მოსალოდნელი არაა.
„პატარა კომპანიები აძვირებენ და აძვირებენ, თუმცა „ჩირინას“ შემთხვევებში ეს ასე არ არის“, - აღნიშნა რევაზ ვაშაკიძემ.
თაკო კვაჭანტირაძე