ქვეშეთი -კობის გზის მშენებლობა 2024  წლის  ბოლოსთვის  უნდა დასრულდეს. რა ეტაპზეა სამშენებლო სამუშაოები, რამდენად სარგებლის მომტანი იქნება აღნიშნული გზა და ხომ არ უქმნის გარემოს და კულტურული მემკვიდრეობის ძეგლებს საფრთხეს ამ და სხვა თემებზე რადიო „კომერსანტის“ გადაცემაში „კომერსანტის დილა“ პროექტის სპიკერმა იმედა დვალიძემ ისაუბრა.

მისი თქმით, ამ გზის მშენებლობა მისი მდგომარეობს გამო ძალიან მნიშვნელოვანია გეოგრაფიული და კლიმატური მდგომარეობის გამო. რადგან როდესაც საქართველოში ზამთრდება ქვეყნის ორი მუნიციპალიტეტი, დუშეთი და სტეფანწმინდა ერთმანეთს წყდება და დაახლოებით 100 დღის მანძილზე მოწყვეტილია.

„გზის არარსებობა მრავალ სოციალურ თუ ჰუმანიტარულ პრობლემას იწვევს ზამთარში. გარდა იმისა, რომ ადამიანების გადაადგილება ფერხდება, ფერხდება ტრანზიტული მიმოსვლაც და გზაც დიდი რისკის შემცველია. მასზე  გადაადგილება  სახიფათოა და ერთი ადგილიდან მეორემდე მისვლას საკმაოდ ხანგრძლივი დრო სჭირდება. ამ პროექტის განხორციელების შემდეგ გზა იქნება გამტარუნარიანი, თანამედროვე და უსაფრთხო. არც ტრანზიტული მიმოსვლა შეფერხდება. კიდევ ერთი კონკრეტული სეგმენტი, რომელიც ამ პროექტშია, ეს არის  გზა გუდაურამდე, რომელიც ქვეშეთიდან სულ ახლო მანძილიდან გაკეთდება. ეს იქნება ავტონომიური გზა გუდაურისთვის და კურორტზე წამსვლელი ადამიანები კონკრეტულად ამ გზით ისარგებლებენ და ტრანზიტული მიმოსვლა დაბის გადატვირთვას აღარ გამოიწვევს და მაგალითისთვის თბილისიდან ან სხვა ადგილიდან გუდაურამდე მისვლის დრო შემცირდება“, - აღნიშნა იმედა დვალიძემ.

რაც შეეხება ეკოლოგიას და კულტურული მემკვიდრეობის ძეგლებს და ბუნებას, იმედა დვალიძის თქმით რა თქმა უნდა, ასეთი მასშტაბური ინფრასტრუქტურული პროექტი  გარემოზე გარკვეულ გავლენას და ზემოქმედებას გულისხმობს, თუმცა მსგავსი პროექტების მიზანი ამ ზემოქმედებების მინიმალიზაცია უნდა იყოს და იმ შემთხვევაში, თუ გარემოს რამე ზიანი მიადგება მისი გამოსწორება სახელმწიფომ ან კომპანიამ, რომელიც პროექტს ასრულებს უნდა უზრუნველყოს.

„როგორც კი დასრულდება პროექტი და გარემოზე რამე ზემოქმედების კვალი იქნება, ყველაფერი საწყის ფორმას დაუბრუნდება. გზა ალპურ ზონაშია, შესაბამისად არ  არის ტყის მასივები, რომლის  გაჩეხაც გახდებოდა საჭირო. რაც შეეხება კულტურულ მემკვიდრეობას ხეობაში არაერთი ეროვნული თუ ლოკალური მნიშვნელობის ნაგებობაა, მაგრამ  სახელმწიფომ ბოლო დრომდე ამ  ძეგლების მისახედად ვერ მოცალა და პროექტმა განაპირობა ის, რომ კულტურული მემკვიდრეობის დაცვის  სააგენტომ არსებული ძეგლები აღწერა. მათი მდგომარეობა შეისწავლა და პროცესში მათი მონიტორინგი განხორციელდება, ამ პროექტის  გარეშე მეტი  შანსი იყო იმისა, რომ ეს  ძეგლები დაგვეკარგა, თუმცა ახლა მათთვისაც გაჩნდა შანსი“, - აღნიშნა იმედა დვალიძემ.

რაც შეეხება საზოგადოებაში გავრცელებულ მოსაზრებას იმის  შესახებ, რომ ეს გზა ქვეყანას რუსეთთან უფრო დაახლოებებს, იმედა  დვალიძე ამბობს, რომ ეს ძალიან ინფანტილური მიდგომაა და ამ მიდგომით ნებისმიერი გზა, რომელიც ჩრდილოეთის მიმართულებით მიდის არ უნდა აშენდეს, ხოლო არსებული გზების დემონტაჟი მოხდეს.

დვალიძემ ასევე აღნიშნა, რომ ის ორგანიზაციები, რომლებიც  ამ  პროექტს  ახორციელებენ ძალიან ზრუნავენ თავიანთ რეპუტაციაზე და  შესაბამისად მათი პროექტში მონაწილეობა თავშივე რისკების პრევენციას გულისხმობს.

პროექტის სპონსორები არიან ევროპისა და რეკონსტრუქციის განვითარების ბანკი და აზიის განვითარების ბანკი, პროექტის ჯამური ღირებულება 1 200 000 000 ლარს  შეადგენს.

თაკო კვაჭანტირაძე