რეგიონებში ბუნებრივი აირის არასამომხმარებლო ტარიფი იზრდება. მცირე და საშუალო საწარმოთა ასოციაციის ხელმძღვანელი, მიხეილ ჭელიძე ,,ბიზნესპრესნიუსთან“ ამბობს, რომ ეს ამ ეტაპზე ბიზნესს არ დააზარალებს და მომხმარებლისათვის გაიზრდება ფასები.

მისივე თქმით, თუ ტარიფის ზრდა გარდაუვალია, ჯობია ეს ერთიანად მოხდეს, რათა ბიზნესმა გრძელვადიან პერსპექტივაში დაგეგმვა შეძლოს.

,,თვითღირებულებაში ბუნებრივი აირის წილი საკმაოდ მაღალია. ამას ბიზნესი საკუთარ თავზე ვერ აიღებს, მომხმარებლისათვის მოხდება ტარიფების ზრდა. ასე რომ, ეს ამ ეტაპზე ბიზნესს არ დააზარალებს, რადგან ყველას მოუწევს გაზრდა და რეალიზაცია ამიტომ არ შემცირდება. მხოლოდ ერთ, რომელიმე საწარმოს ხომ არ შეეხება. შესაბამისად, ეს იქნება დარტყმა მომხმარებლის ჯიბეზე, რომელსაც ისედაც გაზრდილი ფასების პირობებში უწევს კოვიდის დროს ცხოვრება. ყველა ადამიანი, როგორც მომხმარებელი ხედავს, რა აგრესიულად იზრდება ფასები და ამას ტენდეციის სახე აქვს.

ზოგადად კი, ტარიფის ზრდა თუ გარდაუვალია, ჯობია ერთიანად გაიზარდოს და არა ასე, ნელ-ნელა. ეს შექმნის მეტი სტაბილურობის განცდაც და ბიზნესი, შეძლებს გრძელვადიან პერსპექტივაში დაგეგმოს საქმიანობა“, - განაცხადა მცირე და საშულო საწარმოთა ასოციაციის დირექტორმა ,,ბიზნესპრესნიუსთან“.

შეგახსენებთ, რეგიონებში გაზის ტარიფი 6-დან 20 თეთრამდე იზრდება. 2021 წლის 1-ლი დეკემბრიდან არასაყოფაცხოვრებო მომხმარებლებისთვის 1მ3 ბუნებრივი აირი 1.15 ლარი ხდება. ბიზნესისთვის გაზის ტარიფის გაზრდასთან დაკავშირებით განცხადება უკვე გაავრცელეს კომპანიებმა.

bpn.ge