მსოფლიოში უმსხვილესი ონლაინ-რითეილერი კომპანია Amazon-ი არსებული ავტოპარკის შეცვლას გეგმავს. კომპანიის მიწოდების სერვისში ამ დროისთვის ჩართულია საწვავზე მომუშავე ავტომობილები, რომლებიც კომპანიის გეგმის თანახმად ელექტრომობილებით ჩანაცვლდება. Amazon-ის სტრატეგია ითვალისწინებს 2040 წლისთვის კომპანიის სრულ დეკარბონიზაციას. აღნიშნულის შესახებ კომპანიის ხელმძღვანელმა ჯეფ ბეზოსმა გლაზგოში მიმდინარე გაერო-ს 2021 წლის კლიმატის ცვლილების კონფერენციის (COP26) ფარგლებში, მსოფლიო ლიდერების სამიტზე სიტყვით გამოსვლისას განაცხადა.
„ჩვენ ავიღეთ ვალდებულება 2040 წელს გავიდეთ ნულოვან ემისიებზე. ამ მიზნის მისაღწევად 2025 წლისთვის ჩვენ 100%-ით გადავალთ განახლებად ენერგიაზე და უკვე ახლა ვმუშაობთ ავტოპარკის ჩანაცვლებაზე, რომლითაც ვაწარმოებთ მიწოდების მომსახურებას კლიენტებისთვის“, - განაცხადა მან.
Amazon-ის თავკაცმა კიდევ ერთხელ გაიმეორა, რომ კომპანია 2 მილიარდ დოლარს გამოყოფს კლიმატის ცვლილების წინააღმდეგ ბრძოლაში. „ჩვენ უნდა შევინარჩუნოთ ის, რაც დარჩა და უნდა აღვადგინოთ ის, რაც დავკარგეთ“, - განაცხადა მან.
ბეზოსმა სიტყვით გამოსვლისას დასძინა, რომ კოსმოსში ახლახან გაფრენამ ის კიდევ ერთხელ დაარწმუნა, თუ რამდენად მოწყვლადია დედამიწა მოსალოდნელი კლიმატური ცვლილების პირისპირ. „როცა პლანეტას ზემოდან უყურებ, ატმოსფერო იმდენად თხელი მოსჩანს, ხოლო სამყარო იმდენად სუსტი“.
bpn,ge