Amazon-მა შესაძლოა, თავისი სამარკო ნიშნით პროდუქციის წარმოების ბიზნესი შეწყვიტოს, რადგან რამდენიმე ქვეყანაში კომპანია ანტიმონოპოლიური გამოძიების წინაშე დადგა. The Wall Street Journal-ის(WSJ) ცნობით, ეს საკითხი კომაპანიის ტოპ-მენეჯერებმა განიხილეს.
აშშ-ისა და ევროპის რეგულატორები Amazon-ს ბრალს სდებენ, რომ კომპანია გამყიდველების შიდა მონაცემებს ყველაზე პერსპექტიული პროდუქტების შერჩევისა და მათი კოპირების მიზნით იყენებს. შემდეგ თავისი სამარკო ნიშნით ამ პროდუქტებზე დაბალ ფასებს აწესებს და საძიებო სისტემაში პრიორიტეტს ანიჭებს.
მართალია, Amazon-ში აცხადებენ, რომ „სერიოზულადარ განიხილავენ“ საკუთარი სავაჭრო ნიშნის ბიზნესის დახურვას, თუმცა, WSJ-ის ცნობით, ბაზარმა ასეთი პროდუქტების რაოდენობის მკვეთრი შემცირება უკვე დაიწყო.
Amazon-მა საკუთარი სავაჭრო მარკების პროექტი 2009 წელს დაიწყო, თუმცა ამ დროის განმავლობაში მნიშვნელოვან შედეგებს ვერ მიაღწია. კომპანიის დამფუძნებელმა, ჯეფ ბეზოსმა გუნდს ამოცანად დაუსახა, რომ საცალო გაყიდვებში კერძო ეტიკეტებით პროდუქციის წილი 10%-მდე უნდა გაზრდილიყო, რასაც საქონლის ასორტიმენტის გაფართოება მოჰყვა. საკუთარი წარმოების ბრუნვას Amazon ყოველწლიურად ზრდიდა.
2020 წლის მდგომარეობით, კომპანიის 45 სხვადასხვა სავაჭრო ნიშნით 243 ათასი პროდუქტი იწარმოებოდა. ეს არის, კერძოდ, Amazon Basics, რომელიც ნაგვის ტომრებიდან დაწყებული ბატარეებითა და საოფისე სკამებით დამთავრებული, პროდუქციის ფართო ასორტიმენტს აწარმოებს. ასევე, Amazon Essentials, რომელიც ტანსაცმლის ხაზს წარმოადგენს. თუმცა საკუთარი სავაჭრო მარკის პროდუქტებიდან კომპანიის შემოსავალი მხოლოდ 1%-ს შეადგენს.
წყარო: bpn.ge