„ამბობენ, რომ მე-13 კვარტალია ინფლაცია მიზნობრივ მაჩვენებელზე მაღალია, რაც არ არის სწორი. მაგალითად 2020 წლის დეკემბერში წლიური ინფლაცია იყო 2.4% ანუ მიზნობრივი ინფლაციის ქვემოთ. არ ვამბობ, რომ ახლა რაც ხდება კარგია, უბრალოდ არ გვინდა მონაცემები დამახინჯებულად იყოს“, — ამის შესახებ ეროვნული ბანკის პრეზიდენტმა კობა გვენეტაძემ, გადაცემაში „ბიზნეს ინსაიდერი“ გიორგი აბაშიშვილთან ერთად განაცხადა.

ეროვნული ბანკის პრეზიდენტი ამბობს, რომ საქართველოში მიწოდების ფაქტორებს დაემატა კურსის გაუფასურება და ამიტომ ჩვენთან ინფლაცია სხვა ქვეყნებთან შედარებით, უფრო ადრე დაიწყო.

„ინფლაცია აქტუალური საკითხია არამარტო საქართველოში, არამედ მსოფლიოში. სანამ დაიწყებოდა რუსეთის ბარბაროსული ომი უკრაინაში, ფიგურირებდა აზრი, რომ ინფლაცია რომელიც მსოფლიოში არსებობდა, ეს გარდამავალი იყო. მას პანდემიიდან გამომდინარე თავისი მიზეზები ჰქონდა, ეს იყო მიწოდების ჯაჭვები, გართულებული ეკონომიკური ურთიერთობები და შემდეგ უკვე დაუბრუნდებოდა თავის სამიზნე მაჩვენებელს. ამ პერიოდშიც კი როდესაც ინფლაცია უფრო და უფრო იზრდებოდა ევროზონაში, აშშ და სხვა ქვეყნებში, იქ მარეგულირებლები არ ამკაცრებდნენ მონეტარულ პოლიტიკას, რადგანაც ეს ინფლაციის შემცირებას მცირედით თუ გამოიწვევდა, რადგან ძირითადი მიზეზი მაშინ მიწოდების ფაქტორები იყო.

რაც შეეხება საქართველოს, რომელიც რა თქმა უნდა გლობალური ეკონომიკის ნაწილია. ჩვენთან მოხდა კურსის გაუფასურება, რადგან მცურავი გაცვლითი კურსი გვაქვს, რომელიც შოკის კარგი მშთანთქმელია, აქ მიწოდების ფაქტორებს დაემატა კურსის გაუფასურება და ამიტომ ჩვენთან ინფლაცია უფრო ადრე დაიწყო. ახლა თუ შევადარებთ დინამიკას, თუ როგორ ხდება ინფლაცია სხვა ქვეყნებში, იქ ბევრგან მზარდია და ჯერ კიდევ პიკისთვის არ მიუღწევია, ჩვენთან კი შემცირების ტემპი აქვს“, — აღნიშნავს კობა გვენეტაძე.

ინფლაციის პროგნოზზე საუბრისას კობა გვენეტაძე განმარტავს, რომ დღევანდელი პროგნოზით ინფლაცია წლის ბოლოს დაახლოებით 9.5% იქნება, მიზნობრივ მაჩვენებელს კი მომავალი წლის შუა პერიოდში დაუახლოვდება.

„დღეისათვის პროგნოზირებაც რთულია. თუმცა იმ პროგნოზით, რომელიც ჩვენ გვაქვს ინფლაცია გააგრძელებს შემცირების ტრენდს, თუმცა ის მნიშვნელოვნად არ შეიცვლება. მაგალითად თუ ახლა გვქონდა 10.9% წლიური ინფლაცია, დაახლოებით 9.5% იქნება წლის ბოლოს, თებერვლიდან დაიწყებს შემცირებას და 2023 წლის შუა ნახევრიდან დაუახლოვდება მიზნობრივ მაჩვენებელს. თუმცა შეიძლება ისეთი სიტუაცია მოხდეს, რომლის წინასწარ გათვალისიწინება შეუძლებელია. თუმცა ეს არ არის მხოლოდ ჩვენი პროგნოზი, ამას საერთაშორისო სავალუტო ფონდიც და მსოფლიო ბანკიც იზიარებს“, — განმარტავს კობა გვენეტაძე. 

ცნობისთვის, აგვისტოში წინა წელთან შედარებით ფასების საერთო დონე 10.9%-ით გაიზარდა, რაც ივლისში არსებულ 11.5%-იან ინფლაციასთან 0.6 პროცენტული პუნქტით ნაკლებია.