ამერიკის რამდენიმე შტატის გუბერნატორმა სამთავრობო ალკოჰოლური სასმელების მაღაზიებს უბრძანა, უკრაინელი ხალხისადმი სოლიდარობის ნიშნად, რუსული წარმოების არყისა და გამოხდილი ალკოჰოლური სასმელების გაყიდვა შეწყვიტონ, ხოლო ზოგიერთი ბარის მფლობელი, რუსეთის აგრესიის პროტესტის ნიშნად, გარეთ გამოვიდა და Stolichnaya-ს არაყი დემონსტრაციულად გადაღვარა. ინფორმაციას Reuters ავრცელებს.
იუტას გუბერნატორი, სპენსერ კოქსი ერთ-ერთი ბოლო გუბერნატორია, ვინც შტატის ალკოჰოლური სასმელების კონტროლის დეპარტამენტს დაავალა, რუსული წარმოების და ბრენდირებული პროდუქტები საცალო მაღაზიების დახლებიდან ამოეღო. ამ აღმასრულებელი ბრძანების გამოცემით, სპენსერ კოქსი ნიუ-ჰემფშირის, ოჰაიოსა და პენსილვანიის გუბერნატორებს შეუერთდა, ვისი გადაწყვეტილებაც, Reuters-ის შეფასებით, უფრო სიმბოლური მხარდაჭერის ჟესტია.
„ჩვენს წვლილს შევიტანთ, რომ უკრაინაში ჩვენს დებთან და ძმებთან დავდგეთ და რუსმა დამპყრობლებმა უკან დაიხიონ,“ - აცხადებს გუბერნატორი კოქსი.
მისი თქმით, იუტა ყველა სახელმწიფო შესყიდვას გადახედავს, რომ რუსული ხელშეკრულებები გადაამოწმოს.
Reuters-ის შეფასებით, ნაკლებად სავარაუდოა, ბოიკოტს ხელშესახები გავლენა ჰქონდეს, რადგან შეერთებული შტატების დისტილირებული ალკოჰოლური სასმელების საბჭოს მონაცემებით, მაგალითად, 2021 წლის პირველ ნახევარში აშშ-ში იმპორტირებული არყის მოცულობიდან რუსეთის წილი მხოლოდ 1.2% იყო. საბჭოს მონაცემები აჩვენებს, რომ 2021 წელს შეერთებულ შტატებში 1,4 მლრდ დოლარის არყის მთლიანი იმპორტიდან რუსულმა არაყმა მხოლოდ 18,5 მლნ დოლარი შეადგინა, რაშიც 660 მლნ დოლარი საფრანგეთში წარმოებული რუსული არყის წილია.
ცნობილია, რომ ბევრი რუსული არაყი, რომელიც შეერთებულ შტატებში იყიდება, მათ შორის Smirnoff და Stolichnaya, რეალურად სხვა ქვეყნებში, მათ შორის თვით ამერიკაშიც მზადდება.
საბჭოთა კავშირის დაშლის შემდეგ, ბრენდ Stolichnaya-ს მფლობელობა რუსულ სახელმწიფო კომპანიასა და Stoli Group-ს შორის სადავო გახდა, თუმცა აშშ-ში გაყიდულ არაყს სწორედ Stoli Group აწარმოებს. Stoli Group ბრენდს ლატვიაში აწარმოებს. კომპანიამ განაცხადა, რომ უკრაინელ ხალხს მხარს უჭერს. ამჟამად Stoli-ს ვებვერდზე გამოსახულია მტრედი ზეთისხილის რტოთი უკრიანულ ღია ცისფერ და ყვითელ ფერებში. მტრედის ქვემოთ წერია შეტყობინება: „Stoli Group მხარს უჭერს ევროპაში მშვიდობასა და უკრაინელ ხალხთან სოლიდარობას.“ აღსანიშნავია, რომ კომპანიამ, პროტესტის ნიშნად, რებრენდინგის გადაწყვეტილება მიიღო და არაყი Stolichnaya-ს ნაცვლად, Stoli-ს ბრენდით გამოვა.
აშშ-ში ყველაზე პოპულარული რუსული წარმოების არაყი Russian Standard-ია, რომელსაც ამერიკის ბაზარზე მოსკოვში დაფუძნებული Roust Group და Roust International ყიდის. ის, ასევე, Green Mark Vodka-ს ბრენდით იყიდება.
კანადის ზოგიერთმა პროვინციამ, მათ შორის ონტარიომ, ალბერტამ და ბრიტანეთის კოლუმბიამ, გასულ კვირას მსგავსი ნაბიჯი გადადგა. ადმინისიტრაციებმა პროვინციულ ალკოჰოლურ მაღაზიებს უბრძანეს, რუსული წარმოების ბრენდების გაყიდვა შეეწყვიტათ.
ტეხასის შტატში გუბერნატორმა, გრეგ ებოტმა ალკოჰოლური სასმელის ყველა მაღაზიასა და რესტორანს მოუწოდა, ნებაყოფლობით საფუძველზე რუსული წარმოების პროდუქტების მომსახურება შეწყვიტონ.
„ტეხასი უკრაინის გვერდით დგას,“ - წერს გუბერნატორი Twitter-ზე.