“Mega Millions-ის” ლატარიის გათამაშების იღბლიანმა მომხმარებელმა, ისტორიაში ერთ-ერთი ყველაზე მაღალი პრიზი მოიგო.

“Mega Millions-ის” ოფიციალურ საიტზე განთავსებული ინფორმაციის მიხედვით, ლატარიის მოგებულმა, რომლის ვინაობაც ჯერ დადასტურებული არ არის, გათამაშების ექვსი ციფრი გამოიცნო, რის შედეგადაც 1.337 მილიარდი დოლარი მოიგო. გათამაშება 19 ივლისს ჩატარდა და მისი მომგებიანი ნომრები იყო: 13, 36, 45, 57, 67 და 14. 

მთავარი პრიზის რაოდენობა მხოლოდ მცირედით ჩამოუვარდება 2016 წლის იანვარში სხვა ამერიკული ეროვნული ლატარიის, “Power Ball-ის” მიერ დაწესებულ მსოფლიო რეკორდს, რომლის რაოდენობაც 1.586 დოლარს შეადგენს. თუმცა, მაშინ მოგებული თანხა სამ გამარჯვებულს შორის გაიყო. 

ეს გამარჯვება არ იყო “Mega Millions-თვის” პირველი. 2018 წელს მათ გათამაშებაში ერთ-ერთმა მონაწილემ 1.5 მილიარდი დოლარი მოიგო. ეს კი მსოფლიოში მეორე ყველაზე მაღალი პრიზია. 

წინა 29 გათამაშებაში პრიზი არავის მოუგია, მთავარი პრიზის რაოდენობა უკვე სამი თვის განმავლობაში იზრდება. 

ოფიციალურ მონაცემთა მიხედვით, “Mega Millions-ში” ჯეკპოტის მოგების შანსები 303 მილიონში ერთია, რაც გაცილებით დაბალია ვიდრე ელვის დარტყმის შანსი. (მილიონში ერთი) 

იმ შემთხვევაში, თუ გამარჯვებული თანახმა იქნება მოგებული თანხის 30 წლის განმავლობაში განვადებით მიღებაზე, მას 1.337 მილიარდი დოლარის ოდენობის მოგება მთლიანად გადაეცემა. ხოლო, თუ იგი გადაწყვეტს მთლიანი თანხის ერთიანად მიღებას, “Mega Millions-ის” გამოთვლებით, ჯამური თანხა შემცირდება 780,5 მილიონ დოლარამდე, მის დიდ ნაწილს დაიკავებს გადასახადები.

კომპანია გამარჯვებულებს ურჩევს დახმარება მიიღონ ფინანსური მრჩევლებისგან, მანამ სანამ მოგებულ თანხას მიიღებენ. ფინანსური ექსპერტი, რობერტ პაგლიარინი ასევე ურჩევს მათ, რომ ერთი წუთით “თავი დააღწიონ” სიტუაციის სიგიჟეს და კარგად დაფიქრდნენ იმაზე, თუ ცხოვრების რომელი ასპექტების შეცვლა სურთ. 

“Mega Millions-ის” მთავარი დირექტორის, პეტ მაკდონალდსის თქმით, კომპანია საკმაოდ მოხარულია იმით, რომ მსოფლიოში ერთ-ერთი ყველაზე დიდი გამარჯვების მოწმე გახდა. ხოლო კონსორციუმის წამყვანმა დირექტორმა კომპანიის ვებსაიტის მეშვეობით განაცხადა, რომ მათ ერთი სული აქვთ გაიგონ ვინ არის გამარჯვებული და ელოდებიან შესაძლებლობას მიულოცონ მას. 

“Mega Millions-ის” ლატარია აშშ-ს 45 შტატში არსებობს.