ლოგისტიკაში მიმდინარე შეფერხებები და ცვლილებები საავტომობილო ბიზნესისთვის პრობლემებს ქმნის. სექტორის წარმომადგენლები აცხადებენ, რომ პანდემიამდე ავტომობილის ჩამოყვანა აშშ–დან თვენახევარში შეიძლებოდა, მაგრამ იანვარ-თებერვალში დაძრული ტვირთებს დანიშნულების ადგილამდე ჯერაც არ ჩამოუღწევია. რუსეთ–უკრაინის ომმა გადაზიდვები კიდევ უფრო გაართულა და პანდემიისას შექმნილი სიტუაცია უფრო გაართულა.
პრობლემას, რასაც მოქალაქეები ავტომობილის ყიდვისას აწყდებიან, მიწოდების ჯაჭვის კრიზისად აფასებს ,,კომერსანტთან“ ,,კავკასიის ავტოიმპორტის“ გენერალური დირექტორი გიორგი სურგულაძე.
მიიღე ინფორმაცია უფრო სწრაფად „კომერსანტის“ Telegram-ზე.
,,საავტომობილო ბიზნესში ვითარება ბოლო თვეების განმავლობაში მნიშვნელოვნად არ შეცვლილა. შიდა გაყიდვებზეც და რეექსპორტზეც ზრდის ტენდენცია შენარჩუნებულია. ყაზახეთი და ყირგიზეთი საკმაოდ აქტიურად არიან ქართულ ბაზარზე შემოსული და გაჰყავთ ავტომობილები. რაც შეეხება გადაზიდვებს, ამ მხრივ ამერიკაში შექმნილი სიტუაცია საერთოდ დამოუკიდებელი პრობლემაა. ეს არის მიწოდების ჯაჭვის კრიზისი, რომელიც არც ამერიკას, არც ევროპას და აზიას არ უნახავს. თურქეთი შუა რგოლია ამ ჯაჭვში და შესაბამისად, მათაც ეხება ეს პრობლემა, მაგრამ ამერიკის პორტებში უფრო მწვავედ არის გამოსახული, პრობლემა გამოიწვია პანდემიურმა ვითარებამ ჩინეთში. გვეგონა, დასრულების პირას იყო კრიზისი, მაგრამ ისევ გააქტიურდა. პრობლემა დასავლეთის სანაპიროდან დაიწყო, კალიფორნიაში იყო მწვავე სიტუაცია, მაგრამ გამოსწორდა და გადმოვიდა აღმოსავლეთ ნაწილზე - ნიუ-ჯერსისა და ნიუ-იორკის მიმართულებაზე, კრიზისია. კერძოდ, ჩინეთმა დაკეტა დიდი ხნით პორტები, რამაც გემების დაგროვება გამოიწვია, საქონელი დიდი ხნით ვერ მიეწოდებოდა და წამოვიდა ერთბაშად აღმოსავლეთ სანაპიროსკენ, რამაც ლამის კოლაფსი გამოიწვია“, - აცხადებს ,,კომერსანტთან“ გიორგი სურგულაძე.
მისი თქმით, თურქეთიდან საქართველოს შემთხვევაში მეტწილად ჩვეულებრივ მოდის ტვირთები. იშვიათი გამონაკლისის გარდა, ამ მხრივ პრობლემა ნაკლებადაა.
როგორც გიორგი სურგულაძე ამბობს, მთლიანობაში გლობალურ ბაზრებსა და საქართველოშიც მანქანებზე მოთხოვნა გაზრდილია. ფასები კი დაახლოებით 10-15%-ით არის გაზრდილი და ცვლილება ფაქტობრივად ყველა ბაზარზე აისახა.
მარი ჩიტაია