გადამზიდავი კომპანიები, ამერიკის საწყობში შესულ ამანათებზე ტრანსპორტირების საფასურს ზრდიან. ფასების ზრდა მიმდინარე წლის ზაფხულიდან ეტაპობრივად დაიწყო.
როგორც „კომერსანტს“ კომპანია „სქაი ლოჯისტიქსში“ განუცხადეს, ამერიკიდან საჰაერო გადაზიდვების ტარიფის მნიშვნელოვანი ცვლილება არ მომხდარა, თუმცა აშშ-ში საწვავის მნიშვნელოვანი გაძვირების გამო, ადგილზე მკვეთრად გაიზარდა გადაზიდვის ხარჯები, რამაც საბოლოო ჯამში საქართველოში ტვირთის ტრანსპორტირების ფასსზეც ჰპოვა ასახვა. როგორც „სქაი ლოჯისტიქსში“ აცხადებენ რუსეთის მიერ უკრაინაში ფართომაშტაბიანი საომარი მოქმედებების დაწყების შემდეგ აშშ-დან გადაზიდვების ფასი საშუალოდ 20-30%-ითაა გაძვირებული.
აღსანიშნავია, რომ დღეს 20 სექტემბერს გადამზიდავი კომპანია camex-ისგან მომხმარებელმა შემდეგი შინაარსის ელექტრონული ფოსტა მიიღო.
„ძვირფასო მომხმარებელო, გაცნობებთ რომ 1-ლი ოქტომბრიდან, ამერიკის საწყობში შესულ ამანათებზე ტრანსპორტირების საფასური იზრდება.ფიზიკური პირები - 1კგ - 9$, იურიდიული პირები - 1კგ - 8.35$, პრომო მომხმარებლები - 1კგ - 8.7$.
პატივისცემით, კამექსი“ - წერია ელექტრონულ ფოსტაში.
„კომერსანტი“ კომპანია usa2georgia - ს დაუკავშირდა, სადაც განგვიცხადეს, რომ 2022 წლის 1-ლი ივლისიდან 1 კგ ამანათის გადაზიდვის საფასური შეიცვალა და 8 დოლარის ნაცვლად 9 დოლარი გახდა.
კომპანია inex -ში 1 კგ ამანათის ჩამოტანის საფასური 7.9 დოლარია. ხოლო სტუდენტური ტარიფით 7,5 დოლარი.
„ჩვენთან ტარიფი დაახლოებით ზაფხულში შეიცვალა, იმ პერიოდისთვის სტანდარტული ტარიფი 1 კგ-ზე 7 დოლარს, ხოლო სტუდენტური ტარიფი 1 კგ-ზე 6,5 დოლარს შეადგენდა“, — აცხადებენ inex -ში.
გადამზიდავი კომპანია „ამანათი“-ის აშშ-დან ტვირთების და ამანათების ტრანსპორტირების დღევანდელი ფასები შემდეგნაირად გამოიყურება: ფიზიკურ პირზე: 1 კილოგრამი - 7.90$ და იურიდიულ პირზე: 1 კილოგრამი - 7.50$.
თაკო კვაჭანტირაძე