შეერთებულმა შტატებმა რუსეთის მთავრობას ნება არ დართო, 600 მლნ დოლარზე მეტი სუვერენული ვალი ამერიკულ ბანკებში არსებული რეზერვებიდან გადაეხადა, რაც, Reuters-ის შეფასებით, მოსკოვზე ზეწოლის გამკაცრებასა და მის მფლობელობაში არსებული დოლარის შენახვაზე კონტროლის გამკაცრებას ისახავს მიზნად.
როგორც ცნობილია, 24 თებერვალს, უკრაინაში რუსეთის შეჭრის შემდეგ დაწესებული სანქციების შედეგად, აშშ-ის ფინანსურ ინსტიტუტებში შენახული რუსეთის ცენტრალური ბანკის უცხოური ვალუტის რეზერვები გაიყინა. თუმცა მაშინ სახაზინო დეპარტამენტმა რუსეთის მთავრობას უფლება დაუტოვა, ეს თანხა დოლარში დენომინირებულ სუვერენულ ვალზე კუპონის გადახდის თითოეულ შემთხვევაში გამოეყენებინა.
გუშინ, როცა ობლიგაციებზე ყველაზე დიდი ვალის გადახდის ვადა იწურებოდა, რომლის ძირითად თანას 552,4 მლნ დოლარი შეადგენდა, აშშ-ს მთავრობამ გადაწყვიტა, მოსკოვისთვის გაყინულ სახსრებზე წვდომა გაეუქმებინა. გუშინ, ასევე, რუსეთს 2042 წლის სუვერენული დოლარის ობლიგაციებზე კუპონებით 84 მლნ დოლარი უნდა გადაეხადა. ამის შესახებ Reuters-ს აშშ-ს ხაზინის წარმომადგენელმა განუცხადა.
მისი თქმით, ეს ნაბიჯი მიზნად ისახავს, აიძულოს მოსკოვი, თანხა დოლარის იმ რეზერვებიდან დახარჯოს, რომელზეც ვალების გადახდისა თუ სხვა მიზნებისთვის, მათ შორის ომის მხარდაჭერისთვის აქვს წვდომა. ხაზინის სპიკერი ამბობს, რომ თუ რუსეთი ამას არ გააკეთებს, ის ისტორიული დეფოლტის წინაშე დადგება.
„რუსეთმა არჩევანი უნდა გააკეთოს ახალი შემოსავლებით მიღებული დოლარის დარჩენილი ძვირფასი რეზერვების ამოწურვასა და დეფოლტს შორის,“ - აცხადებენ სახაზინო დეპარტამენტში.
ხაზინამ, ასევე, შეაჩერა JPMorgan Chase & Co, რომელიც, როგორც კორესპონდენტი ბანკი, აქამდე გადახდებს ამუშავებდა. კორესპონდენტი ბანკი რუსეთიდან კუპონის გადახდებს ამუშავებს და გადახდის აგენტთან აგზავნის, რომ მან ობლიგაციების უცხოელ მფლობელებზე გაანაწილოს.
ხაზინის წყაროს თქმით, რუსეთს გადახდის შესასრულებლად 30-დღიანი საშეღავათო პერიოდი აქვს.
რუსეთს მთლიანობაში 15 საერთაშორისო ობლიგაცია აქვს, რომლის ნომინალური ღირებულება, დაახლოებით, 40 მლრდ დოლარია. თუ მოსკოვი ობლიგაციების რომელიმე მომავალ გადახდას წინასწარ განსაზღვრულ ვადებში ვერ განახორციელებს ან დოლარის, ევროს თუ სხვა ვალუტის კუპონებს რუბლებში გადაიხდის, ეს დეფოლტს გამოიწვევს.