გარემოს ეროვნული სააგენტოს ცნობით უახლოეს დღეებში საქართველოში თოვლი და ნისლია მოსალოდნელი.

meteo.gov.ge-ის თანახმად აღმოსავლეთ საქართველოში დღეს საშუალო ტემპერატურა +1 გრადუსი იქნება, იქროლებს აღმოსავლეთის ძლიერი ქარი 20-25 მ/წმ სიჩქარით.

ძლიერი თოვაა მოსალოდნელი 12-13 იანვარს, ტემპერატურა ღამით -9 გრადუსამდე დაიწევს. შენარჩუნდება აღმოსავლეთის ძლიერი ქარი.

უმეტესად უნალექო ამინდია მოსალოდნელი 14 იანვარს, თუმცა დაბალი ტემპერატურით და ძლიერი ქარით.

უახლოეს დღეებში დასავლეთ საქართველოს ბარში ყინვა მოსალოდნელი არაა, თუმცა იქროლებს განსაკუთრებით ძლიერი ქარი, რომლის სიჩქარეც 12 იანვარს 25-34მ/წმ-ს მიაღწევს. ძლიერი ქარი შენარჩუნდება  11-14 იანვრის პერიოდში, ტემპერატურა ღამით +1, დღე კი +14 გრადუსი იქნება.

თოვლი და ნისლია მოსალოდნელი დღეს თბილისში, ტემპერატურა 0 გრადუსი იქნება.  12 იანვარს დედაქალაქში ღამით ტემპერატურა -6 გრადუსამდე დაიწევს, დღე კი -1 გრადუსი იქნება, მოსალოდნელია თოვა.  ნალექის შემცირება მოსალოდნელია 13 იანვრიდან.  13-14 იანვარს ტემპერატურა ღამით -4-მდე დაიწევს. დღე კი 0, +2 გრადუსი იქნება.

ამინდის გაუარესებასთან დაკავშირებით გარემოს ეროვნულმა სააგენტომ განცხადება გაავრცელა.

"საავტომობილო გზების ცალკეულ მონაკვეთებზე შესაძლებელია ნისლი, ქარბუქი, ხილვადობის გაუარესება, ლიპყინული, ელექტროგადამცემ ხაზებზე შემოყინულობა.

11 იანვარს ღამის საათებში დასავლეთ საქართველოს დაბლობში ჰაერის ტემპერატურის -3, -5 გრადუსამდე მოსალოდნელმა დაწევამ შესაძლებელია ციტრუსოვანი კულტურების (განსაკუთრებით ლიმონის) დაზიანება, აღმოსავლეთ საქართველოს ბარში კი ტემპერატურის -8, -10 გრადუსამდე დაწევამ თოვლის საფარის გარეშე დარჩენილი საშემოდგომო ნათესების დაზიანება გამოიწვიოს", - აღნიშნულია გარემოს ეროვნული სააგენტოს ინფორმაციაში.