დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ქვეყანაში კორონავირუსის "ომიკრონის" შტამი აქტიურად ცირკულირებს. გამყრელიძის განმარტებით, საქართველოში ლაბორატორიულად დადასტურებულია ომიკრონის 1754 ფაქტი, საიდანაც 1184 შემთხვევა შეისწავლეს. მისივე თქმით, 1184 პაციენტიდან 3 გარდაიცვალა. ჰოსპიტალიზაცია დასჭირდა მხოლოდ 38 ადამიანს. ამირან გამყრელიძის ინფორმაციით, 1184-დან 14%-ის შემთხვევაში რეინფიცირება დადასტურდა.
„ყველა დადებითი შემთხვევის 90-95%-ში უკვე „ომიკრონის“ შტამი ცირკულირებს. ლაბორატორიულად დადასტურებულია 1754 „ომიკრონის“ შემთხვევა. აქედან შესწავლილია დეტალურად 1184 შემთხვევა. 1184 შემთხვევიდან 50% იყო ორჯერ ვაქცინირებული და 14%-ში გვაქვს რეინფიცირება, ანუ ადამიანი, ვისაც მანამდე ჰქონდა „დელტა“, დაემართა „ომიკრონი“. ამ 1184-დან 38-ის შემთხვევაში გახდა ჰოსპიტალიზაცია საჭირო. 1184-დან 3-ის შემთხვევაში გვქონდა გარდაცვალება, მაგრამ ეს არ ნიშნავს იმას, რომ იანვრის განმავლობაში ან დეკემბრის მეორე ნახევარში „ომიკრონისგან“ გარდაიცვალა მხოლოდ 3 ადამიანი, იმიტომ რომ ეს გახლავთ ლაბორატორიულად დადასტურებულ შემთხვევებზე,“ - აღნიშნა ამირან გამყრელიძემ.
მისივე განმარტებით, მიუხედავად იმისა, რომ კორონავირუსის შემთხვევების რაოდენობა ქვეყანაში მზარდია, ჰოსპიტალურ სექტორზე დატვირთვა არ იმატებს.
„ეპიდსიტუაციის ყველა მაჩვენებელი, როგორიცაა დადებითობა, ინციდენტობა, რეპროდუქციის ინდექსი, გახლავთ გაზრდილი, მაგრამ ჯერჯერობით მძიმე შემთხვევების რაოდენობა კლინიკებში და ასევე, დატვირთვა, როგორც ინტენსიურზე, ისე რეანიმაციაზე არ იმატებს, ისევე როგორც ჰოსპიტალურ სექტორზე. ძირითადი დატვირთვა არის ლაბორატორიულ და ამბულატორიულ სექტორზე. მიუხედავად იმისა, რომ დღეს ქვეყანაში 164 000 აქტიური შემთხვევა გვაქვს, სისტემა მუშაობს და უძლებს,“ - აღნიშნა გამყრელიძემ.
დაავადებათა კონტროლის ეროვნული ცენტრის ხელმძღვანელმა ვაქცინაციის აუცილებლობაზე კიდევ ერთხელ ისაუბრა და მოსახლეობას აცრისკენ მოუწოდა.
ipn.ge