გაფართოებული ტესტირების შედეგად, ლილოს ბაზრობაზე ამ დროისთვის ეპიდემიოლოგებმა 100-მდე ბიოლოგიური ნიმუში აიღეს, - ამის შესახებ „ტვ პირველის“ ეთერში დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ განაცხადა.
მისივე თქმით, რეგულაციებით გათვალისწინებული მოთხოვნების აღსრულებაზე მონიტორინგი ბაზრობებზე ყოველდღიურად და მათ შორის ლილოს ბაზრობაზეც, თუმცა დღეიდან იქ გაფართოებული ტესტირება მიმდინარეობს.
„ამ მომენტისთვის დაახლოებით, 100 ბიოლოგიური ნიმუშია აღებული. გუშინ ინფიცირებული კონტაქტებიდან 30 იყო გამოკვლეული და მათგან კორონავირუსი ოთხს დაუდასტურდა. შემდეგ გამთენიისას დაემატა კიდევ და სულ ლილოს კლასტერიდან 8 ახალი შემთხვევა გვაქვს“, - განაცხადა გამყრელიძემ.
მისივე თქმით, გაფართოებული ტესტირების ჩატარებაში მათ ლილოს ბაზრობის დირექცია ხელს უწყობს, რათა ყველაფერი ორგანიზებულად მოხდეს. გამყრელიძემ აღნიშნა, რომ დღეს იქ ეპიდემიოლოგების ორი ბრიგადა მუშაობს. ხვალ კიდევ ორი დაემატება და თუ საჭირო გახდა, კიდევ გაიზრდება ეპირემიოლოგების რაოდენობა.
საქართველოში კორონავირუსის 19 ახალი შემთხვევიდან 8 ლილოს ბაზრობაზეა გამოვლენილი, 5 - გაჩიანიდანაა, 2 შემთხვევა იმპორტირებულია და მათგან ერთი სატვირთოს მძღოლია, ასევე, ინფიცირებულთაგან ერთი სამედიცინო პერსონალია, სამის წყარო კი ჯერ დაუდგენელია.
ამჟამად კოვიდცნტრებში კი 214 პციენტი მკურნალობს. 1 პაციენტი კი გამოჯანმრთელდა.
ამ დროისთვის საქართველოში კორონავირუსის 1104 შემთხვევაა დადასტურებული, გამოჯანმრთელებულია 912 ადამიანი, 16 პაციენტი კი გარდაიცვალა.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.