დღეს თუ გვაქვს ჩვენ 15 000 შემთხვევა, არ ნიშნავს რომ 15 000-ია. ეს არის რაც ლაბორატორიულად დადგინდა. ანუ, უნდა ვივარაუდოთ, რომ შემთხვევები სამჯერ მაინც მეტია. მაგრამ ჯერჯერობით, ჩვენი გათვლებით პიკზე არ გავსულვართ. ჯერჯერობით „ომიკრონის“ ტალღის ახალი, აღმავალი ტალღაა ქვეყანაში, რომელიც 2-3 კვირის განმავლობაში უნდა გაგრძელდეს. ჯერ პიკი არ არის, - ამის შესახებ „ქრონიკის“ ეთერში დაავადებათა კონტროლის ცენტრის ხელმძღვანელმა, ამირან გამყრელიძემ განაცხადა. გამყრელიძე ვარაუდობს, რომ კორონავირუსის შემთხვევების რიცხვი მომდევნო ორი კვირის განმავლობაში გაიზრდება.

„მოსალოდნელია, რომ ზრდა კიდევ იყოს დადასტურებული შემთხვევების. ამის არაპირდაპირი მიმანიშნებელია დადებითობის მაჩვენებელი, რომელიც ყოველდღიურად დაახლოებით 20% გვაქვს. ასევე გაზრდილია ბოლო 7 და 14 დღის მაჩვენებელიც, რაც მიანიშნებს რომ „ომიკრონის“ ცირკულაცია ძალიან აქტიურია ქვეყანაში. ჩვენი გათვლებით ყველა დადებითი შემთხვევისა რაც ვლინდება არის „ომიკრონი“. მოგეხსენებათ ახლა გავრცელებულია 2 ქვე შტამი ომიკრონის და ორივეა საქართველოში დადასტურებული - BA1 და BA2, რომელიც უფრო სწრაფად ვრცელდება ვიდრე მისი წინამავალი; სწრაფად ვრცელდება, მაგრამ, ასევე პირველ შტამზე ნაკლებ აგრესიულია. თუ შევხედავთ იმ ქვეყნების გამოცდილებას, რომლებმაც უკვე გადაიარეს „ომიკრონის“ ტალღა, ვნახავთ, რომ ეს გრძელდება დაახლოებით 2-3 კვირა. ვფიქრობთ, რომ ეს კვირა და მომავალი კვირა უნდა იყოს შედარებით რთული.

შემთხვევათა რაოდენობა გაიზრდება, მაგრამ ჰოსპიტალურ სექტორზე ზეწოლა ჯერჯერობით არ არის. სტაციონარიზაციაზე მოთხოვნა მნიშვნელოვნად არ იზრდება. 1600 ლაბორატორიული შემთხვევიდან 1% იყო სტაციონარიზაცია და იქაც არ ყოფილა ინტენსიურ თერაპიაში მოხვედრის და ხელოვნური ვენტილაციის საჭიროება. მაგრამ, ამან არ უნდა გაგვათამამოს, რადგან რიცხვია ძალიან დიდი, ერთდროულად ძალიან ბევრი ადამიანი ინფიცირდება, ამიტომ მთავარი გზავნილი უნდა იყოს, რომ ნებისმიერი სიმპტომის შემთხვევაში, დავრჩეთ სახლში, რომ არ იყოს მეტი გადამდებლობა. უკვე არ არის აუცილებელი, რომ დღეს ტესტი ჩაიტარო და დაიდგინო, იმიტომ რომ, ძირითად შემთხვევებში 4-5 დღის განმავლობაში ეს ადამიანები ხდებიან ასიმპტომურები, მაგრამ მთავარია, რომ დაცული იყოს იზოლაციის და კარანტინის პირობები“, - განაცხადა გამყრელიძემ.

imedinews.ge