"ვფიქრობ, სააღდგომო დღესასწაულთან დაკავშირებით დამატებითი შეზღუდვები არ იქნება. პატივი უნდა მივაგოთ მიცვალებულებს, მაგრამ არა ფართო ნადიმებით  და ქეიფებით, შედარებით მოკრძალებულები ვიყოთ, წლევანდელი ეპიდვითარება უკეთესია, ვიდრე გასულ წლებში იყო“,- ამის შესახებ დაავადებათა კონტროლის ეროვნული ცენტრის დირექტორმა, ამირან გამყრელიძემ  განაცხადა.

როგორც ის აღნიშნავს, წინასააღდგომო პერიოდი გასულ წლებთან შედარებით მშვიდია, მაგრამ ამან არ უნდა გაგვათამამოს.

მოგეხსენებათ, აღდგომის დღესასწაული ერთ-ერთი ყველაზე დიდი დღესასწაულია. საბედნიეროდ, წელს ჩვენ აღდგომას უფრო მშვიდი ეპიდვითარებით ვხვდებით, უფრო ნაკლები რისკით, ვიდრე ეს იყო შარშანწინ, როდესაც ჩვენ ბევრი არ ვიცოდით ამ ვირუსის შესახებ, ასევე გასულ წელს მაღალი მაჩვენებლები გვქონდა.

წელს წინასააღდგომო პერიოდი შედარებით მშვიდი გვაქვს, ამან არ უნდა გაგვათამამოს, ვირუსი ჯერ ქვეყანაში ცირკულირებს. 200-300 შემთხვევვა არის. გასაგებია, რომ ომიკრონია და კლინიკურად უფრო მსუბუქია, ვიდრე შარშანდელი ან გასული წლის.

"ვფიქრობ, დამატებითი შეზღუდები არ იქნება, მაგრამ ჩვენ უკვე ბევრი ვისწავლეთ და გამოვცადეთ. შევეცადოთ უფრო მოკრძალებულები ვიყოთ. რა თქმა უნდა, უნდა აღინიშნოს, აღდგომა დიდი დღესასწაულია, პატივი უნდა მივაგოთ მიცვალებულებს, მაგრამ არა ფართო ნადიმებით“ და „ქეიფებით“. მოგეხსენებათ, ვირუსის გავრცელება ხდება კვებით მიმდინარე წვეულებების დროს. შედარებით მოკრძალებულები ვიყოთ, წლევანდელი ეპიდვითარება უკეთესია, ვიდრე გასულ წლებში იყო“,- აღნიშნავს გამყრელიძე და არ გამორიცხავს, რომ  წელს ჯანმო პანდემიას დასრულებულად გამოაცხადებს.

როგორც გამყრელიძე განმარტავს, ჯანმრთელობის მსოფლიო ორგანიზაცია პანდემიის დასრულების გამოცხადების საკითხს ფრთხილად უდგება.

“პანდემიის დასრულების გამოცხადების უფლებამოსილება მხოლოდ ჯანმრთელობის მსოფლიო ორგანიზაციას აქვს. ისინი ფრთხილად უდგებიან ამ საკითხს, საუბრობენ, რომ დიახ, შესაძლებელია ეს წელს იყოს. ასევე მყარად საუბრობენ, რომ პანდემიის მწვავე ფაზა დასრულებულად მიიჩნიონ, თუმცა, ჯერ არ ჩქარობენ პანდემიის დასრულების გამოცხადებას. მე მაინც ვფიქრობ, რომ წელს ჯანმრთელობის მსოფლიო ორგანიზაცია პანდემიას დასრულებულად გამოაცხადებს. ვფიქრობ, ვირუსის ცირკულაცია ძირითადად გადავა სეზონურ ანუ ენდემურ რეჟიმში, როდესაც როგორც გრიპოზული ინფექცია, წლის გარკვეულ პერიოდში გვექნება და დაგვჭირდება პრევენციული აცრები, ისევე როგორც გრიპის საწინააღმდეგოდ გვჭირდება”, - აღნიშნავს გამყრელიძე.

წყარო: "ინტერპრესნიუსი"