ამსტერდამის მერიამ საბოლოო გადაწყვეტილება მიიღო - „წითელი ფანრების კვარტალი“ - ბორდელებით, სექს-შოპებითა და მარიხუანას ლეგალური გაყიდვით - იხურება.
სავარაუდოდ, ამ ტიპის რაიონი ქალაქის გარეუბანში გაჩნდება, თუმცა ჯერ გაურკვეველია როდის.
ამ გადაწყვეტილების ინიციატორია ქალაქის მერი ფემკე ხახლემა, რომელმაც ეს პოსტი 2018 წელს დაიკავა. მიზეზი კი ის გახდა, რომ ბოლო ათწლეულებში სწორედ ბორდელების და მარიხუანით მოვაჭრე „კოფეშოპების“ რაიონი გახდა ქალაქის მთავარი ღირსშესანიშნაობა და არა თავად ქალაქი, თავისი შუასაუკუნოვანი არქიტექტურითა და არხებით.
მერის თქმით, ამსტერდამი სხვა ტიპის ტურისტების მოიზიდავს და ამისთვის ქალაქის იმიჯის „გადატვირთვას“ გეგმავს.
მერიის გადაწყვეტილებამ რამდენიმე გავლენიანი მემარცხენე პოლიტიკური პარტიის უკმაყოფილება გამოიწვია - ისინი მიიჩნევენ, რომ „წითელი ფანრების“ კვარტლის დახურვა პანდემიის დროს დაზარალებულ ტურისტულ სექტორს კიდევ უფრო დააზარალებს.
პანდემიამდე ამსტერდამში ყოველწლიურად 20 მლნ.-მდე ტურისტი ჩამოდიოდა. ჩატარებული კვლევის თანახმად, მათ შორის, ვინც საზღვრების გახსნის შემდეგ ამსტერდამში გამგზავრებას გეგმავს, 11%-მა განაცხადა, რომ წითელი ფანრების კვარტლის დახურვის შემთხვევაში ქალაქში ჩასვლას არარ დააპირებს.
„წითელი ფანრების“ ინდუსტრიის წარმომადგენლებს შორის, ქალაქის ბიუჯეტში ყველაზე დიდი წვლილი პროსტიტუციას მოდიოდა. მეძავეების საქმიანობა მკაცრად რეგლამენტირებულია. „სერვისი“ მინიმუმ 15 წუთი გრძელდება, და 30-დან 100 ევრომდე ფასდება.
მეძავეები ბიუჯეტში შემოსავლის 33-52%-ს იხდიან, მათ საშუალო შემოსავალი კი დღე-ღამეში 200-დან 600 ევრომდე მერყეობს, ფართის ყოველდღიური ქირა კი 150-160 ევროა. კვარტალში 400-მდე ბორდელი მუშაობს
გარდა ამისა, ცენტრში ბევრი ოჯახი საკუთარ ფართებს საკმაოდ მაღალ ფასში აქირავებს.
ამსტერდამის მერიაში მიიჩნევენ, რომ გადაწყვეტილება ტურისტულ ინდუსტრიას არ დააზარალებს, რადგანაც ბორდელების, სექს-შოპების და კოფეშოპების მოყვარულებს ლოკაციის შეცვლა დიდად არ შეაწუხებს - მათთვის მთავარია ამ სერვისების არსებობის ფაქტი, ადგილმდებარეობა კი მეორეხარისხოვანია.
მით უმეტეს, ამსტერდამი შედარებით პატარა ქალაქია და არც ერთი მისი გარეუბანი არაა ისეთი შორი, რომ იქ ჩასვლა პრობლემას წარმოადგენდეს.
რაიონში, სადაც „წითელი ფანრების კვარტალი“ გადავა, უკვე აშენდა ბოქსები, სადაც განთავსდება ბორდელები, ასევე შენდება ადგილები კაფეებისთვის და სექს-შოპებისთვის. ეს უბანი ძალიან შორს არაა, იქ ავტობუსი და ტრამვაიც დადის, შესაბამისად, ყველაფერი გაკეთდა იმისთვის, რომ არც სექს-ინდუსტრია და არც ქალაქის ბიუჯეტი არ დაზარალდეს.
„ვისაც სექს-მომსახურეობა სურს - გარეუბანში წავა, იმათ კი, ვისაც ძველი ქალაქის განუმეორებელი ატმოსფერო იზიდავს, ბევრი საინტერესო რამ ელის - არხები, პარკები მუზეუმები, რემბრანდტი, ვან გოგი, განუმეორებელი არქიტექტურა. 21-ე საუკუნეში არაა სასიამოვნო იყო ქალაქი, სადაც ნარკოტიკების და მეძავეებისთვის ჩამოდიან“ - ამბობს ქალაქის მერი.
ექსპერტების აზრით, ზოგადად სექს-ინდუსტრია, იმ ფორმით, როგორიც ის ამსტერდამშია, წარსულს ბარდება - მეძავეები კლიენტებს ძირითადად ინტერნეტით პოულობენ, არანაირ რეგულაციებს არ ექვემდებარებიან, და არავითარ გადასახადებს არ იხდიან.
ასე რომ, ადრე თუ გვიან, „წითელი ფანრების რაიონი“ თავისით დაიხურებოდა.
gazeta.ru
მოამზადა თენგიზ აბლოთიამ