რადიო კომერსანტის ეთერში, ლევან კობერიძის საავტორო გადაცემაში „ბრენდი საქართველო“ საპენსიო სააგენტოს ყოფილმა დირექტორმა ლევან სურგულაძემ საპენსიო სააგენტოს მნიშვნელობაზე და იმ რისკებზე ისაუბრა, რაც სააგენტოს და ფონდის გარშემო არსებობს. მისი თქმით, 4 წლის თავზე საპენსიო სააგენტოში უკვე 3 მლრდ-ზე მეტი თანხა აკუმულირდა, 3 000 მოქალაქე უკვე პენსიონერი გახდა და დანაზოგი მათზე უკვე გაიცა.
ამას გარდა, ლევან სურგულაძემ განაცხადა, რომ კანონის მიხედვით სააგენტოს თანხების მიმართვა შესაძლებელია მხოლოდ ფასიან ქაღალდებში და ინფორმაცია იმის შესახებ, რომ შეიძლება საპენსიო სააგენტოს დანაზოგი ანაკლიის პორტის პროექტს მოხმარდეს, კანონის ძალით შეუძლებელია, ვინაიდან ანაკლიის პორტი მნიშვნელოვანი და სტრატეგიული პროექტია, მაგრამ სტარტაპია და მას არანაირი ფულადი შემოსავალი არ აქვს.
„კანონში წერია, რომ ეს ფული შეიძლება განთავსდეს ფასიან ქაღალდებში. თუ მაგალითად გვაქვს მომუშავე ჰესი და მეპატრონეს უნდა მეორე ჰესის აშენება, მაშინ შეუძლია გამოუშვას ფასიანი ქაღალდი, როგორც საკრედიტო, ისე წილობრივი. მერე შეიძლება იმაზე მსჯელობა, შესაძლებელია თუ არა საპენსიო სააგენტოს თანხის განთავსება ამ ჰესის ფასიან ქაღალდებში.
რაც შეეხება ანაკლიის პორტს, ეს სტარტაპია, მსხვილი, სტრატეგიულად მნიშვნელოვანი პროექტია, მაგრამ ფონდის ფულს ასე კანონით ვერ მიიღებს, აკრძალულია, რადგან მას არანაირი ფულადი შემოსავლები არ აქვს. მოსახლეობამ რომ იცოდეს, შეუძლებელი იქნება საპენსიო ფონდიდან თანხების მიმართვა ანაკლიის პორტის პროექტში“, - განაცხადა ლევან სურგულაძემ
ლევან სურგულაძემ რადიო „კომერსანტის“ ეთერში ფონდის მნიშვნელობასა და მოსახლეობისთვის მის სარგებლიანობაზეც ისაუბრა.
„დაგროვებით პენსიის კანონის მიხედვით, მოქალაქეები საკუთარი შემოსავლიდან ფონდში მცირე ნაწილს 2%-ს აგროვებენ, იმავდროულად დამსაქმებელიც 2%-ს ურიცხავს და სახელმწიფოც - 2%-ს. რეალურად თქვენი დანაზოგი მომენტალურად ოთხმაგდება, ანუ 375% ამონაგები ერიცხება მოქალაქეს. მაგალითად, თუ დაზოგეთ 15 ლარი, გახდება - 60“, - განაცხადა ლევან სურგულაძემ.
საპენსიო ფონდის ყოფილმა ხელმძღვანელმა დანაზოგების დაცულობაზეც ისაუბრა და აღნიშნა, რომ მოქალაქეების დანაზოგები დაცულია გაცილებით უკეთესად და მძლავრად, ვიდრე ნებისმიერი სხვა აქტივი. კანონის მიხედვით, ამ აქტივებზე არ ვრცელდება არანაირი აღსრულების მექანიზმი, არ შეიძლება ის ვინმემ რამეში გაქვითოს ან მისი კონფისკაცია მოახდინოს. რაც არ უნდა დააშავოს ადამიანმა, მისი საპენსიო ფონდი ხელუხლებელია. ეს არის კანონით გარანტირებული და ამის გარანტია საქართველოს სახელმწიფო.
ლევან სურგულაძის თქმით, კანონით საპენსიო სააგენტომ ამ ფულის ინვესტირება უნდა მოახდინოს, რომ მოქალაქემ მეტი სარგებელი ნახოს. არავითარ შემთხვევაში არ შეიძლება ამ თანხის განთავსება სტარტაპებსა და სხვა პროექტებში. ეს თანხა უნდა განთავსდეს მხოლოდ ფასიან ქაღალდებში. ისინი მკაცრად რეგულირდება. მათი მარეგულირებელი ეროვნული ბანკია.
ლევან სურგულაძემ ისიც თქვა, რომ ქვეყანაში მსგავსი ტიპის ინსტიტუციების არსებობა ხელს უწყობს უცხოური ინვესტიციების ზრდას და ქვეყანაში ფინანსური ნაკადების შემოსვლას.
მოამზადა მაკა ბიბილაშვილმა