ანა მეტრეველმა და იანა მურღულიანმა რაჭაში, უწერაში კოტეჯი „იანო“ მშენებლების, „მალიარების“, სანტექნიკოსებისა და დურგლების გარეშე, საკუთარი ხელებით ააშენეს. კოტეჯის სახელწოდება რაჭულ სიმღერა „რაჭა, იანოს“ უკავშირდება.

ანამ გერმანიაში აიმაღლა კვალიფიკაცია ტურიზმის სფეროში და საქართველოში დაბრუნების შემდეგ, მეგობართან ერთად, 2 წლის წინ უწერაში კოტეჯის აშენება გადაწყვიტა.

იანა მურღულიანი „კომერსანტთან“ საუბრისას აცხადებს, რომ კოტეჯის შენება 2022 წლის მაისში დაიწყეს, სექტემბერში დაასრულეს და პირველი დამსვენებელი უკვე ოქტომბერში მიიღეს.

„ჩვენი საკუთარი ხელებით, მეგობრების დახმარებით, გავაკეთეთ ყველაფერი, მუშაც კი არ დაგვიქირავებია. თავიდან ვერ ვერკვეოდით, მოვიძიეთ, წავიკითხეთ, მეგობრებს რჩევებს ვეკითხებოდით. მასალები თბილისიდან მოგვქონდა. მათი შეგროვება და რაჭაში ჩატანა ერთი წლით ადრე დავიწყეთ. ორივეს მანქანები გვყავს და ნაწილ-ნაწილ ჩაგვქონდა. საბოლოოდ, 2-სართულიანი კოტეჯი გამოვიდა, 2 იზოლირებული საძინებლით და სველი წერტილებით, რომელსაც დიდი და კეთილმოწყობილი ეზო აქვს და 6+2 ადამიანზეა გათვლილი. ზაფხულში ვგეგმავთ, რომ ეზოში ღია პატარა აუზები მოვაწყოთ. მეორე კოტეჯის აშენებაც გვინდოდა, მაგრამ მომხმარებლის მოთხოვნაა, რომ კოტეჯი და ეზო იზოლირებული იყოს“, - აცხადებს იანა მურღულიანი

რაკი დაქირავებული მუშახელი არ ჰყოლიათ და ყველაფერი საკუთარი ხელებით გააკეთეს, „იანოს“ აშენება და კეთილმოწყობა მეგობრებს 70 000 ლარამდე დაუჯდათ.

როგორც თავად ამბობენ, კოტეჯზე მოთხოვნა მოსალოდნელზე დიდია. ფასს რაც შეეხება, სეზონების მიხედვით ცვალებადია.

„კლიენტები გვყავდა უცხოელებიც, მაგრამ ქართველი დამსვენებელი უფრო მეტია. ვგეგმავთ, რომ ზაფხულში ის ფასი დავტოვოთ რაც რაჭის ბაზარზეა, დაახლოებით 300 ლარი ღამეში და დანარჩენ სეზონზე უფრო დაბალი იქნება. ამ ეტაპზე 1 ღამის ფასი 220 ლარია“, - აცხადებს იანა მურღულიანი.