ბრედ პიტი ყოფილ მეუღლეს, ანჯელინა ჯოლის ფრანგული ღვინის ქარხნის წილის რუსი ბიზნესმენისთვის მიყიდვის გამო უჩივის. Reuters-ის ცნობით, Chateau Miraval-ის ღვინის ქარხანა ბრედმა და ანჯელინამ ერთად შეიძინეს, სადაც დაქორწინდნენ კიდეც.
ლოს-ანჯელესის უზენაეს სასამართლოში შეტანილ სარჩელში პიტი აცხადებს, რომ ჯოლიმ დაარღვია შეთანხმება, რის მიხედვითაც Chateau Miraval-ში თავისი წილი მეორე მხარის თანხმობის გარეშე არ უნდა გაეყიდა. ანჯელინა ჯოლიმ თავისი აქციები ალკოჰოლური სასმელების მწარმოებელ კომპანია Stoli Group-ს მიჰყიდა, რომელსაც რუსი ოლიგარქი, იური შეფლერი აკონტროლებს.
ოსკაროსანმა წყვილმა Chateau Miraval-ში საკონტროლო პაკეტი 2008 წელს შეიძინა. ქარხანა სამხრეთ-აღმოსავლეთ საფრანგეთში, მარსელსა და ნიცას შორის, სოფელ კორენსში მდებარეობს, სადაც წყვილი 2014 წელს დაქორწინდა.
58 წლის ბრედ პიტი სარჩელში აცხადებს, რომ მან „ფულისა და ოფლის კაპიტალი“ ჩადო, რომ Miraval, ვარდისფერი ღვინის მწარმოებლებს შორის, ყველაზე მეტად მოთხოვნად კომპანიად გადაექცია, რომლის წლიური შემოსავალი 50 მლნ დოლარს აღემატება.
მან 46 წლის ჯოლი „დაუმსახურებელი მოგების მიღებაში დაადანაშაულა, რამაც კომპანიას ზიანი მიაყენა. თავად ანჯელინა ჯოლის ადვოკატები კომენტარს ჯერ არ აკეთებენ.
სარჩელის თანახმად, ჯოლიმ 2021 წლის იანვარში პიტს განუცხადა, რომ „გულდამძიმებულმა მიიღო მტკივნეული გადაწყვეტილება, გაეყიდა Miraval-ის აქციები, რადგან ალკოჰოლური სასმელების ბიზნესის მფლობელი პირადი მიზეზების გამო ვეღარ იქნებოდა. საჩივარში, ასევე, ნათქვამია, რომ პიტსა და ჯოლის შორის მოლაპარაკებები ხუთი თვის შემდეგ ჩაიშალა.
Stoli Group-ში შემავალმა განყოფილება Tenute del Mondo-მ ღვინის ქარხანაში ანჯელინა ჯოლის წილის შესყიდვის შესახებ ოქტომბერში განაცხადა.
სარჩელში ბრედ პიტი, კონტრაქტის დარღვევის გამო, ზარალის ანაზღაურებას დაუზუსტებელი კომპენსაციისა და ჯარიმის სახით მოითხოვს.
ჯოლიმ პიტთან განქორწინების პროცედურა 2016 წელს დაიწყო, რაც 2019 წელს დასრულდა. მათ ექვსი შვილი ჰყავთ.
წყარო: ინტერპრესნიუსი