სანქციებთან დაკავშირებით დღევანდელ განცხადებებში პუტინი ისეთი თავდაჯერებული იყო, რომ, ჩემი აზრით, რუსეთს კარგად აქვს გაცნობიერებული იმ ეკონომიკური სანქციების მასშტაბები, რასაც შეიძლება აშშ-მა და ევროპამ მიმართონ, - ამის შესახებ „ქრონიკის“ ეთერში ექსპერტმა, ანდრია გვიდიანმა განაცხადა.
მისივე თქმით, მეორე მხრივ, დასავლურ მედიაში გავრცელებული ინფორმაციის საფუძველზე შეიძლება ვივარაუდოთ, რომ ეს სანქციები რუსეთისთვის დამანგრეველი არ იქნება.
„SWIFT-იდან გათიშვა არ არის პანაცეა. ამას აქვს ორი მხარე. თუ რუსული ბანკები გაითიშება SWIFT-იდან, ეს პირდაპირ დაარტყამს ასევე ევროპულ კაპიტალს, იმიტომ რომ რუსული ბანკების კაპიტალის უდიდესი წილი სწორედ ევროპულ ინვესტორებზე მოდის. შესაბამისად, ეს დააზიანებს როგორც რუსულ საბანკო სექტორს, ასევე ევროპელ ინვესტორებს. რისკებს შეიცავს ისიც, რომ რუსეთმა შეიძლება გადახდების ალტერნატიული სისტემა შექმნას და ამაზე საკმაოდ მკაფიო განცხადება გაკეთდა ჩინეთის მხრიდანაც. ასე რომ, ისიც უნდა გავითვალისწინოთ, რომ რუსეთი და ჩინეთი დღეს მოკავშირეები არიან და ამ ორი ქვეყნის ურთიერთკავშირი საკმაოდ დიდი ძალაა. მართალი გითხრათ, ევროპას არ აქვს არანაირი ბერკეტი, რომ სანქციების გზით დღეს, ხვალ ან ერთი-ორი თვის განმავლობაში რუსეთის თავხედობა შეაჩეროს. ევროპამ უკვე დაიწყო თხევადი ბუნებრივი აირის იმპორტი და რესურსები საკმაოდ გაზრდილია, მაგრამ ეს მთელი ევროპის მოხმარების მხოლოდ 12-13 პროცენტს აკმაყოფილებს. შესაბამისად, დანარჩენი ბუნებრივი აირის იმპორტის თვალსაზრისით ის დამოკიდებულია რუსეთზე. არსებობს ევროპული გეგმა, რომ 120 მლრდ კუბურ მეტრამდე შეიძლება გაიზარდოს თხევადი გაზის იმპორტი და მინიმუმამდე შემცირდეს რუსული გაზის იმპორტი, მაგრამ დღეს არ მოხდება უახლოესი თვეების განმავლობაში. ამას სჭირდება უფრო დიდი დრო“, - აცხადებს ანდრია გვიდიანი.
imedinews.ge