კორონავირუსის პანდემიის გავრცელების შესაჩერებლად მცირე ბიზნესიდან რესტორნები ერთ-ერთი ობიექტია, რომლებიც შემოსავლისა და ანტიკრიზისული გეგმის გარეშე დარჩნენ. დაწესებული შეზღუდვების გაუქმების შემდეგ კი საქართველოში რესტორნების დიდი ნაწილი ფუნქციონირებას ვეღარ გააგრძელებენ.
ამის მიზეზი ის ხარჯია, რომელიც ბიზნესს ყოველდღიურად აწვება, შემოსავალი კი ნულს უტოლდება. განსაკუთრებით მძიმე მდგომარეობა აქვთ იმ ობიექტებს, რომლებსაც საბანკო ვალდებულება ან იჯარის ქირა აქვთ გადასახდელი. როგორც ბიზნესის წარმომადგენლებს, ასევე რესტორატორთა ასოციაციაშიც მიაჩნიათ, რომ არსებულ სიტუაციაში აუცილებელია ბიზნესს სახელმწიფომ შესთავაზოს ანტიკრიზისული გეგმა.
„გასტრონომიული ტურიზმის ბიზნესის ასოციაციის“ დამფუძნებელის ქეთევან კვიჭიძის განცხადებით, საქართველოში რესტორანთა დიდ ნაწილს არც ანტიკრიზისული გეგმა აქვს და დიდი ნაწილი ფუნქციონირებას ვეღარ გააგრძელებს, რადგან მათთმა ხარჯმა უკვე შემოსავლებს გაუსწრო, რის გამოც იძულებულები არიან ბაზარი დატოვონ.
„ისეთი მდგომარეობაა შექმნილი, რომ წინასწარ რთულია ივარაუდო თუნდაც ანტიკრიზისული გეგმა რა ფორმის უნდა იყოს. ზოგადი ფონი საკმაოდ რთულია , რადგან სარესტორნო ბიზნესი დამოკიდებულია, როგორც ტურიზმზე, ასევე ადგილობრივ მომხმარებელზე. არცერთ მათგანს მომსახურებაზე ხელი აღარ მიუწვდება. სარესტორნო ბიზნესის დიდი ნაწილი მიიღებს დარტყმას, ნაწილი კი ვერც გაიხსნება, რადგან ფართის ქირას ზოგიერთი მათგანი დღემდე იხდის. სხვა საბანკო ვალდებულებებიც აქვთ, რომლებსაც ვერ ისტუმრებენ, ახლა კი გაჩერებულია, მაგრამ როდესაც დაიწყება გადახდა როგორ შეძლებენ ვალის დაფარვას არ ვიცი“-აცხადებს ქეთევან კვიჭიძე.
„წისქვილი ჯგუფის“ აღმასრულებელი დირექტორის გოგა როდონაიას განმარტებით, მიუხედავად იმისა, რომ მათ ობიექტს საბანკო ვალდებულება მაისის ბოლომდე გადაუვადეს, სამი თვის შემდეგ არსებული თანხის გადახდას ანტიკრიზისული გეგმის გარეშე დარშენილი კომპანია ვერ შეძლებს.
„ჩვენ არ გვაქვს ანტიკრიზისული გეგმა და მაქსიმალურად ვცდილობთ მოვერგოთ იმ რეალობას რაც არის შექმნილი. კარგი იქნება თუ მსგავს გეგმას სახელმწიფო შემოგვთავაზებს და ამით მხარს დაგვიჭერს ჩვენ, როგორც ადგილობრივ ბიზნესს. ანტიკრიზისული გეგმა გვაქვს მხოლოდ ის, რომ მინიმუმამდე გვაქვს ხარჯი დაყვანილი და ვცდილობთ გადავრჩეთ.ჩვენნაირი ობიექტების მუშაობა დამოკიდებულია ტურიზმზე და ადგილობრივ სტუმრებზე,მათგან მიღებულ ყოველდღიურ შემოსავალზე, რომელიც აღარ გვაქვს არსებული ვითარების გამო.
არავის ეგონოს ამაში მთავრობას ვადანაშაულებ, გვესმის და ვიაზრებთ, რომ ეს არის გლობალური პრობლემა. თუმცა კარგი იქნება თუ სახელმწიფო გვერდით დაგვიდგება და ბიზნესს გადავარჩენთ, რადგან ეს პირდაპირ უკავშირდება დასაქმებულთა რაოდენობას. გარდა ამისა ობიექტს აქვს ბანკში სასესხო ვალდებულება ,რომელსაც დაფარვა უნდა, ახლა კი შეჩერებულია 3 თვით საბანკო გადასახადები თუმცა, სამი თვის შემდეგ ხომ უნდა გადავიხადოთ, ხომ უნდა გვქონდეს მანამ თანხები.
ის თანხა, რომელიც გადასახდელია 3 თვის შემდეგ ხომ უნდა დაგენერირდეს. ამის ალტერნატივა კი არ გაგვაჩნია. როდესაც ყველაფერი ამოქმედდება, ხარჯს რომ დავეწიო ორჯერ უნდა გამეზარდოს შემოსავლები. ეს როგორ უნდა მოხდეს დღევადენლი გადმოსახედიდან არ ვიცი. რთულია კორონავირუსის პერიოდამდე არსებულ სიტუაციას დაუბრუნდე. გამოძახების სერვისზე ვმუშაობდით და ესეც შეგვიჩერდა, მსუბუქი მანქანების აკრძალვის გამო, რადგან ობიექტამდე ხალხი ხომ უნდა მივიყვანოთ, რომელიც გატანისთვის საჭირო პროდუქტს მოამზადებენ. ახლა მხოლოდ გადაადგილების ნებართვას ველოდებით, როდის განახლდება გადაადგილება არვიცი“-აცხადებს გოგა როდონაია.
ნათია ლომიძე