რუსეთისა და უკრაინის დელეგაციები ფაქტობრივად ყოველდღიურად განიხილავენ შესაძლო შეთანხმების პროექტს ვიდეოკონფერენციის საშუალებით, - ამის შესახებ რუსეთის საგარეო საქმეთა მინისტრმა სერგეი ლავროვმა ჩინურ საინფორმაციო სააგენტო Xinhua-თან ინტერვიუში განაცხადა.

მისი თქმით, ამ დოკუმენტმა უნდა დააფიქსიროს პოსტკონფლიქტური მდგომარეობის ისეთი ელემენტები, როგორიცაა უკრაინის მუდმივი ნეიტრალიტეტი, არაბირთვული, უბლოკო და დემილიტარიზებული სტატუსი, ასევე მისი უსაფრთხოების გარანტიები. ლავროვის მტკიცებით, მოლაპარაკებების დღის წესრიგში ასევე შედის დენაციფიკაციის, ახალი გეოპოლიტიკური რეალობის აღიარების, სანქციების მოხსნის, რუსული ენის სტატუსის და სხვა საკითხები.

სერგეი ლავროვის ინფორმაციით, უკრაინაში სიტუაციის დარეგულირება შესაძლებელს გახდის ევროპასა და მთლიანად მსოფლიოში სამხედრო-პოლიტიკური დაძაბულობის დეესკალაციაში მნიშვნელოვანი წვლილის შეტანას.

ლავროვი ამბობს, რომ ერთ-ერთ შესაძლო ვარიანტად გათვალისწინებულია გარანტორი სახელმწიფოების ინსტიტუტის შექმნა, რომელთა შორის, პირველ რიგში, არიან გაეროს უშიშროების საბჭოს მუდმივი წევრები, მათ შორის რუსეთი და ჩინეთი.

"ჩინელ დიპლომატებს ვუზიარებთ ინფორმაციას მოლაპარაკებების მიმდინარეობის შესახებ,“- აღნიშნა ლავროვმა და მადლობა გადაუხადა პეკინს უკრაინასთან დაკავშირებით "დაბალანსებული პოზიციისთვის".

რუსეთის საგარეო საქმეთა მინისტრის თქმით, რუსეთი მოლაპარაკებების გაგრძელების მომხრეა, მიუხედავად იმისა, რომ მოლაპარაკებები კარგად არ მიდის.

ლავროვი ამტკიცებს, რომ გასული წლების განმავლობაში შეერთებულმა შტატებმა და მისმა მოკავშირეებმა არაფერი გააკეთეს შიდაუკრაინული კონფლიქტის შესაჩერებლად.

„მათ იარაღით გატენეს კიევის რეჟიმი, გაწვრთნეს და შეაიარაღეს უკრაინის არმია და ნაციონალისტური ბატალიონები და განახორციელეს უკრაინის ტერიტორიის სამხედრო-პოლიტიკური განვითარება. ისინი ხელს უწყობდნენ კიევის ხელისუფლების აგრესიულ ანტირუსულ კურსს,“- აღნიშნა ლავროვმა.

მისი მტკიცებით, სწორედ ამის გამო რუსეთს სხვა არჩევანი აღარ ჰქონდა, გარდა „დონეცკისა და ლუგანსკის სახალხო რესპუბლიკების აღიარებისა“ და უკრაინის „დემილიტარიზაციისა“ და „დენაციფიკაციის“ მიზნით „სპეციალური სამხედრო ოპერაციის“ დაწყებისა.

„ფაქტობრივად, ნატო-ს ქვეყნები ყველაფერს აკეთებენ იმისათვის, რომ არ დაუშვან უკრაინასთან ცეცხლის შეწყვეტის მოლაპარაკებები. კიევის რეჟიმისადმი მხარდაჭერის საჯაროდ გამოხატვით, ნატო-ს ქვეყნები ყველაფერს აკეთებენ, რათა არ დაუშვან ოპერაციის დასრულება პოლიტიკური შეთანხმებების მიღებით. უკრაინაში პოლონეთისა და ნატო-ს სხვა ქვეყნების გავლით სხვადასხვა იარაღი იგზავნება გაუთავებელ ნაკადად. ეს ყველაფერი კეთდება „შეჭრასთან ბრძოლის“ საბაბით, მაგრამ, ფაქტობრივად, აშშ და ევროკავშირი აპირებენ რუსეთს „უკანასკნელ უკრაინელამდე“ ებრძოლონ და ისინი აბსოლუტურად გულგრილები არიან უკრაინის, როგორც საერთაშორისო ურთიერთობების დამოუკიდებელი სუბიექტის ბედის მიმართ,“- აღნიშნა ლავროვმა.

მისი თქმით, „საკუთარი გეოპოლიტიკური ამბიციების დასაკმაყოფილებლად დასავლეთი მზადაა საფრთხე შეუქმნას მსოფლიოს მთელი რეგიონების ენერგეტიკულ და სასურსათო უსაფრთხოებას“ და სწორედ ამით აიხსნება ანტირუსული სანქციები, რომლის დაწესებაც დასავლეთმა ე.წ. ოპერაციის დაწყებისთანავე დაიწყო და რომლის გაჩერებასაც არ ფიქრობენ.

„თუ აშშ და ნატო ნამდვილად არიან დაინტერესებული უკრაინის კრიზისის მოგვარებით, მაშინ, პირველ რიგში, მათ უნდა გადაიფიქრონ და შეწყვიტონ კიევისთვის იარაღისა და საბრძოლო მასალის მიწოდება. უკრაინელ ხალხს სჭირდება არა „სტინგერები“ და „ჯაველინები“, არამედ გადაუდებელი ჰუმანიტარული საკითხების გადაჭრა, რუსეთი ამას 2014 წლიდან აკეთებს,“ - განაცხადა ლავროვმა.

მისი მტკიცებით, ე.წ. „სპეციალური სამხედრო ოპერაცია“ გეგმის მიხედვით მიმდინარეობს.

„სპეცოპერაცია გეგმის მიხედვით მიმდინარეობს. მის ფარგლებში რუსი სამხედრო მოსამსახურეები ყველაფერს აკეთებენ იმისათვის, რომ მშვიდობიან მოსახლეობაში არ იყოს მსხვერპლი. დარტყმები ხორციელდება მაღალი სიზუსტის იარაღით, პირველ რიგში, სამხედრო ინფრასტრუქტურის ობიექტებზე და ჯავშანტექნიკის თავმოყრის ადგილებში. უკრაინის არმიისა და ნაციონალისტური შეიარაღებული ფორმირებებისგან განსხვავებით, რომლებიც მოსახლეობას „ადამიანურ ფარად“ იყენებენ, რუსული არმია ადგილობრივ მოსახლეობას ყველა სახის დახმარებასა და მხარდაჭერას უწევს“, - აღნიშნა ლავროვმა.

ლავროვი ამტკიცებს, რომ უკრაინის სპეცსამსახურებმა დასავლელების დახმარებით „მოაწყვეს სისხლიანი პროვოკაცია ბუჩაში, მათ შორის მოლაპარაკების პროცესის გასართულებლად“. მან ისიც თქვა, რომ რუსეთი მზადაა მოლაპარაკებებისთვის, მიუხედავად იმისა, რომ მოლაპარაკებები კარგად არ მიმდინარეობს.

„ჩვენ მომხრე ვართ, რომ მოლაპარაკებები გაგრძელდეს, თუმცა ისინი კარგად არ მიდის. დარწმუნებული ვარ, რომ შეთანხმებების მიღწევა მხოლოდ მაშინ იქნება შესაძლებელი, როცა კიევი დაიწყებს უკრაინელი ხალხის და არა „შორიდან მრჩევლების“ ინტერესებით ხელმძღვანელობას,“- აღნიშნა ლავროვმა და დაამატა, რომ რაც უფრო მალე შეეგუება დასავლეთი ახალ გეოპოლიტიკურ რეალობას, მით უკეთესი იქნება მისთვის და მთელი საერთაშორისო საზოგადოებისთვის.

„დღეს ჩვენ არ ვსაუბრობთ ახალ „ცივ ომზე“, არამედ ვაშინგტონისა და მისი სატელიტების მუდმივ სურვილზე, რომლებიც თავს „კაცობრიობის ბედის არბიტრებად“ წარმოადგენენ, დააწესონ ამერიკაზე ორიენტირებული მსოფლიო წესრიგის მოდელი. საქმე იქამდე მივიდა, რომ დასავლური უმცირესობა ცდილობს შეცვალოს გაერო-ზე ორიენტირებული არქიტექტურა და მეორე მსოფლიო ომის შემდეგ ჩამოყალიბებული საერთაშორისო სამართალი საკუთარ „წესებზე დაფუძნებული წესრიგით“. ამ წესებს თავად ვაშინგტონი და მისი მოკავშირეები წერენ და შემდეგ საერთაშორისო თანამეგობრობას სავალდებულოდ აკისრებენ,“- აღნიშნა ლავროვმა.

მისი მტკიცებით, დასავლეთი „ყველაზე სასტიკი მეთოდებით“ ზეწოლას ახდენს მათზე, ვინც „დამოუკიდებელ კურსს ატარებს საშინაო და საგარეო პოლიტიკაში“.

„კოლექტიური დასავლეთის“ მცდელობები, შეაფერხოს ისტორიის ბუნებრივი მიმდინარეობა, გადაჭრას თავისი პრობლემები სხვის ხარჯზე, განწირულია. დღევანდელ სამყაროს აქვს გადაწყვეტილების მიღების რამდენიმე ცენტრი, ის მრავალპოლარულია. ჩვენ ვხედავთ, როგორ დინამიურად ვითარდება აზიის, აფრიკის და ლათინური ამერიკის სახელმწიფოები. ყველას აქვს არჩევანის რეალური თავისუფლება, მათ შორის განვითარების გზები და ინტეგრაციის პროექტებში მონაწილეობა. ჩვენი სპეციალური სამხედრო ოპერაცია უკრაინაში ასევე ხელს უწყობს მსოფლიოს განთავისუფლების პროცესს დასავლეთის ნეოკოლონიალური ჩაგვრისგან“,- აღნიშნა ლავროვმა.