2022 აპრილის თვეში, ახალი გაცემული იპოთეკური სესხების მოცულობის ზრდა შემცირებულია და 2021 წელთან შედარებით 8%-ს უტოლდება. ამავე პერიოდში, საცხოვრებელი უძრავი ქონების ტრანზაქციების რაოდენობა თბილისში 9%-ით გაიზარდა წ/წ. ამის შესახებ „თიბისი კაპიტალის“ მიმოხილვაშია აღნიშნული.

„აპრილის თვეში არარეზიდენტების უნაღდო ხარჯვამ, თიბისი ბანკის არხებით, 17%-ით გადააჭარბა 2019 წლის მაჩვენებელს. მთლიანი ფულადი გზავნილების შემოდინება კი თიბისი ბანკის არხებით, 9%-ით შემცირდა წ/წ. •იმავე პერიოდში, თიბისი ბანკის არხებით, ფულადი გზავნილები რუსეთიდან 54%-ით გაიზარდა 2021 წელთან შედარებით.

აპრილის თვეში, სურსათსა და ფარმაციაზე რეზიდენტების უნაღდო დანახარჯები 37%-ით გაიზარდა 2021 წელთან შედარებით. სხვა კატეგორიებზე რეზიდენტების უნაღდო დანახარჯები მნიშვნელოვნად შემცირდა და ზრდა 5%-ს შეადგენდა წ/წ.

სასტუმროებში უნაღდო ხარჯვის ზრდა, თიბისი ბანკის არხებით, შენელდა და 9%-ს გაუტოლდა 2019 წელთან შედარებით (+99% წ/წ) . რესტორნებსა და კაფეებში უნაღდო დანახარჯები 126%-ით გაიზარდა 2019 წელთან შედარებით (+168% წ/წ).

ტანსაცმელსა და აქსესუარებზე უნაღდო დანახარჯები გაორმაგდა (+145%) 2019 წელთან შედარებით. გართობაზე უნაღდო დანახარჯები მნიშვნელოვნად გაუმჯობესდა და 2019 წლის დონეს 50%-ით გადააჭარბა. ფიტნესზე უნაღდო ხარჯვა გაორმაგდა და 107% შეადგინა 2019 წელთან შედარებით.

სამშენებლო მასალებზე უნაღდო დანახარჯები 19%-ით გაიზარდა 2021 წელთან შედარებით. ავეჯსა და მოწყობილობებზე უნაღდო ხარჯვის ზრდა 32%-ს გაუტოლდა წ/წ. აპრილში, ელექტრონიკაზე უნაღდო ხარჯვა შესამჩნევად გაუმჯობესდა და ზრდამ 30% შეადგინა 2021 წელთან შედარებით.

აპრილის თვეში, პირად ჰიგიენაზე უნაღდო ხარჯვა 32%-ით გაიზარდა 2021 წელთან შედარებით. მანქანის შეკეთებაზე უნაღდო დანახარჯების ზრდამ 44% შეადგინა წ/წ. საწვავსა და ტრანსპორტზე უნაღდო დანახარჯების ზრდა მცირედით მომატებულია და 39%-ს უტოლდება 2021 წელთან შედარებით.

ექიმთან ვიზიტებზე უნაღდო დანახარჯების ზრდა მცირედით შენელდა და 20% შეადგინა წ/წ. სამედიცინო აღჭურვილობაზე უნაღდო ხარჯვა მნიშვნელოვნად გაიზარდა და 22%- ს გაუტოლდა, 2021 წელთან შედარებით“, — აღნიშნავენ თიბისი კაპიტალში.