COVID-19-მა და რუსეთ-უკრაინის ომმა გლობალური მიწოდების ჯაჭვების შეფერხება და ენერგორესურსების ფასების ზრდა გამოიწვია. შედეგად, დასავლეთის ქვეყნებში შენელდა ეკონომიკური აქტივობა და გაიზარდა ინფლაცია. შესაბამისად, თუ ეკონომიკები რეცესიაში შევა, ამას ძირითადად მიწოდების შოკები განაპირობებს, -ამის შესახებ Galt&Taggart-ის რეპორტში „ინვესტირება რეცესიის დროს“ არის აღნიშნული.

ორგანიზაციის ინფორმაციით, ამჟამინდელი კრიზისის ბუნებიდან გამომდინარე, ცენტრალური ბანკები ზრდიან საპროცენტო განაკვეთებს ინფლაციის მოსათოკად, რაც თავისთავად ეკონომიკურ ზრდას ანელებს.

„ანალიტიკოსების დიდი ნაწილი თანხმდება, რომ აქციების ფასების შემდგომი ვარდნა ჯერ კიდევ მოსალოდნელია. Bank of America-ს მოდელის თანახმად, ბაზრის ფსკერის წინმსწრები ინდიკატორების მხოლოდ 40%-ია ამ დროისთვის იდენტიფიცირებული. ასევე, მნიშვნელოვნად გაზრდილია გეოპოლიტიკური რისკებიც რუსეთში გამოცხადებული სამხედრო მობილიზაციის ფონზე.

რისკის შესამცირებლად, ინვესტორებს შეუძლიათ მიმართონ მრავალ თავდაცვით საინვესტიციო პროდუქტს. ამ ტიპის ინსტრუმენტებია ისეთი ინდივიდუალური აქციები, ეკონომიკის სექტორები და ნედლეული, რომლებიც სტაბილურობას ინარჩუნებს რეცესიულ პერიოდებში. როგორც მომდევნო გვერდეზეა ნაჩვენები, თავდაცვითი აქტივები ხასიათდება ზოგად ბაზართან დაბალი კორელაციით. შესაბამისად, დაღმავალი პერიოდების დროს, ეს აქტივები საშუალოზე უკეთეს შედეგს აჩვენებენ“, — ნათქვამია რეპორტში.