ორგანიზაცია „საქართველოს ადვოკატები დამოუკიდებელი პროფესიისათვის“ და „ბიზნესისა და ტექნოლოგიების აკადემიის“ ჩართულობით ერთობლივი პროექტი განხორციელდა სახელწოდებით - „აქტიური მოქალაქეები ადამიანის უფლებებისათვის“. პროექტი მიზნად ისახავს პროფესიულ სტუდენტთა ცნობიერების ამაღლებას ისეთ საკითხებზე, როგორიცაა აქტიური სამოქალაქო საზოგადოების გავლენა ბიზნესზე, გაეროს გლობალური შეთანხმების ინიციატივა, ბიზნესის სოციალური პასუხისმგებლობა და ასე შემდეგ.
„საქართველოს ადვოკატები დამოუკიდებელი პროფესიისათვის“ გამგეობის წევრმა იოსებ გაბრაევმა პროექტის შესახებ კომერსანტის ეთერში, ნინო ლიპარტიას გადაცემაში „ბიზნესი და სამართალი“ ისაუბრა.
იოსებ გაბრაევის თქმით, პროექტი შედგებოდა 4 ძირითადი მოდულისგან: პირველი მოდული იყო „ნაფიცი მსაჯული როგორც აქტიური მოქალაქე“, მეორე თემა ეხებოდა ბიზნესის სოციალურ პასუხისმგებლობას, მესამე მოდული: შრომით უფლებებთან დაკავშირებით ცნობიერების ამაღლება და მეოთხე მოდული: პერსონალურ მონაცემთან დაკავშირებით ცნობიერების ამაღლება.
„ძალიან ხშირია, რომ ჩვენმა მოქალაქეებმა არ იციან როგორ შეავსონ კითხვარი, რომელიც მათ, როგორც პოტენციურ ნაფიც მსაჯულებს შეიძლება მიუვიდეთ. ჩვენი პროექტის ნაწილშიც, ნაფიცი მსაჯულის ერთგვარ მომზადებას და უნარ-ჩვევებით აღჭურვას ვახდენთ. მოხდა სტუდენტების დასწრება სხდომაზე და ის რაც თეორიული კუთხით შეისწავლეს ტრენინგის დროს, თვალნათელი გახდა,“- აღნიშნა იოსებ გაბრაევმა. მისი თქმით, პროექტის მოდულებში ნაფიცი მსაჯულის საკითხის შეტანის საფუძველი გახდა ის მდგომარეობა, რომ მოქალაქეების უმრავლესობა ცდილობს თავი აარიდოს ნაფიც მსაჯულობას.
რაც შეეხება დანარჩენ მოდულებს, იოსაებ გაბრაევის თქმით, პროექტი ამ ეტაპზეც მიმდინარეობს და თეორიული და პრაქტიკული ნაწილები აქაც შერწყმულია. მისი თქმით, ბიზნესის სოციალური პასუხისმგებლობის მოდულის განხორციელებისას სტუდენტებს საშუალება ჰქონდათ შეხვედროდნენ გაეროს გლობალური შეთანხმების ბიზნესთან ურთიერთობის მენეჯერი.
პროექტი „აქტიური მოქალაქეები ადამიანის უფლებებისათვის“ პროფესიული უნარების სააგენტოს მხარდაჭერით ხორციელდება.