ჟანგბადის მარაგთან დაკავშირებით ქვეყანაში სრული ინფორმაციული ქაოსია. საჯარო და არასამთავრობო სექტორს ამასთან დაკავშირებით არაერთგვაროვანი პასუხი აქვს. საქართველოს ჯანდაცვის სფეროს წარმომადგენლები აცხადებენ, რომ ჟანგბადის მიწოდებასთან დაკავშირებით შეფერხება არ აქვთ და პაციენტებს ამ მხრივ საფრთხე არ ემუქრებათ. გარდა იმისა, რომ ჟანგბადის რამდენიმე ქარხანა უშუალოდ საქართველოშიც ფუნქციონირებს, საჭიროების შემთხვევაში, ქვეყანას აზერბაიჯანი და თურქეთიც ამარაგებენ. თუმცა, როგორც სპეციალისტები აღნიშნავენ, შემცირებულია ჟანგბადის მოცულობა ყოველ ერთ ავადმყოფზე და დამატებითი რესურსია საჭირო.

საქართველოში რამდენიმე კლინიკაა, რომელსაც აქვს თავისი ავტონომიური ჟანგბადის ქარხანა. სექტორის წარმომადგენლები ,,კომერსანტთან“ აცხადებენ, რომ ჟანგბადის დეფიციტი არ აქვთ. რაც შეეხება სამინისტროსადმი მიმართვიანობას ჟანგბადით მომარაგებასთან დაკავშირებით, როგორც ტუბერკულოზისა და ფილტვის დაავადებათა ეროვნული ცენტრის ხელმძღვანელი ზაზა ავალიანი აცხადებს, ბუნებრივი პროცესია და არ ნიშნავს, რომ დეფიციტი არსებობს. ამ მხრივ, როგორც ავალიანი აღნიშნავს, საზოგადოება არასწორად არის ინფორმირებული.

,,მოწოდებაში შეფერხება არ გვაქვს, ტექნიკური ხასიათის პრობლემა შეიძლება დაფიქსირდეს - მანქანა ფუჭდება, ხან ბალონის პრობლემაა და სხვა, მაგრამ ლოკალურად გვარდება, ამ მხრივ პრობლემა რეალურად არ არსებობს. ის, რომ სახელმწიფოს მივმართავთ და ვითხოვთ მარაგს, არ ნიშნავს, რომ პრობლემაა, ჩვეულებრივი მუშა პროცესია, რაც რატომღაც არასწორად იქნა აღქმული“, - ამბობს ზაზა ავალიანი.

მან ,,კომერსანტთან“ ასევე განაცხადა, რომ კლინიკის ბაზაზე შენდება ჟანგბადის ქარხანა, რომელსაც ,,გლობალური ფონდი“ აფინანსებს. საინვესტიციო თანხის მოცულობაა $300 000. გარდა ამისა, როგორც ავალიანი აღნიშნავს,  ცენტრი უზრუნველყოფილია ჟანგბადის 9  კონცენტრატორით, რომელიც ელექტროენერგიით გამოიმუშავებს ჟანგბადს და საჭიროების შემთხვევაში, დაიტვირთება.

ის, რომ ჟანგბადის დანადგარები ქვეყანას საკმარისი რაოდენობით აქვს, ადასტურებს ჯანდაცვის მენეჯმენტის ექსპერტი ვატო სურგულაძე.  თუმცა აქვე დასძენს, რომ გარკვეული შეფერხება ჟანგბადის მოცულობასთან დაკავშირებით არსებობს.

,,კარგი იქნებოდა, სახელმწიფოს შეეძინა დიდი რაოდენობით ჟანგბადის დანადგარები და გადაეცა კლინიკებისთვის დროებით თუ მუდმივ მფლობელობაში.  პრობლემა თუ არსებობს, უნდა გადაწყდეს, დიდი არაფერია საჭირო, შეუკვეთონ და თურქეთიდან 3 დღეში ჩამოვა. ყველგან არა, მაგრამ ლოკალურად არსებობს ჟანგბადის პრობლემა, ავადმყოფებს არ მიეწოდება იმ წნევით და მოცულობით, რაც მათ სჭირდებათ, ეს არის მთავარი პრობლემა“, - ამბობს სურგულაძე.

სტატისტიკოს  სოსო არჩვაძის განცხადებით, იმის გამო, რომ ავადობა მატულობს, მცირდება ჟანგბადის მოცულობა 1 ავადმყოფზე, ამიტომ დამატებითი რეზერვია საჭირო.

,,ჟანგბადის მარაგი  უცვლელია და მეტია ავადმყოფების რაოდენობა, რომლებიც ჟანგბადს საჭიროებენ. შესაბამისად, უფრო მეტი მოცულობის ჟანგბადი  გვჭირდება.  აშკარაა, რომ სიტუაცია გაუმჯობესებას საჭიროებს. სტუდენტების ჩართვა გახდა საველე ჰოსპიტლებში საჭირო, რადგან სამედიცინო კადრი არასაკმარისია. პრობლემა ნამდვილადაა, რადგან ვიმყოფებით მაღალ პლატოზე, ისეთ მაღალ დონეზე, სადაც ჰაერიც გაიშვიათებულია, მძიმე სიტუაციაა და სამედიცინო სფეროს რესურსი მილევად რეჟიმშია“, - ამბობს არჩვაძე.

ჯანდაცვის მინისტრის მოადგილის თამარ გაბუნიას ინფორმაციით, დღეს კლინიკაში არის 7 400 პაციენტი, მათი დიდი ნაწილი – 70% არის ჟანგბადდამოკიდებული.

,,მთელი ეს პერიოდი კლინიკებთან აქტიურად მუშაობს როგორც ეკონომიკის, ასევე საგარეო საქმეთა სამინისტრო, რომ ჟანგბადის დამატებითი მარაგების მობილიზება მოხდეს სხვადასხვა ქვეყნიდან – აზერბაიჯანი და თურქეთი გვეხმარება. ასევე გასულ წელს და ბოლო პერიოდის განმავლობაში, დაახლოებით 20-25-მა კლინიკამ დაიმატა თავისი ავტონომიური ქარხანა, ანუ ისინი არავისზე დამოკიდებული არ არიან ამ მიმართულებით. ნამდვილად არ არსებობს განგაშის საფუძველი, რადგან არაერთი წყაროდან – იმისთვის, რომ გადაზღვევა მოხდეს, თუ რომელიმე წყარო რაღაც მომენტში შეფერხდება, მეორე წყარო იყოს ადგილზე“, - განაცხადა გაბუნიამ.

ცნობისთვის, ბოლო 24 საათის განმავლობაში საქართველოში კორონავირუსით ინფიცირების 5021 ახალი შემთხვევა დაფიქსირდა, გარდაიცვალა კიდევ 58 პაციენტი.

კორონავირუსის საწინააღმდეგო ვაქცინებით, დღიურად,  28196 მოქალაქე აიცრა.

სულ ქვეყანაში 1038292 აცრა გაკეთდა.

მარი ჩიტაია